კულტურის, სპორტისა და ახალგაზრდობის მინისტრის, თეა წულუკიანის თქმით, რაც უფრო მალე შეწყვეტენ პოლიტიკოსები სამედიცინო თემებზე საუბარს, მით უფრო კარგად იქნება დაცული ამა თუ იმ პატიმრის ინტერესი. ასე ეხმაურება ის ექსპრეზიდენტ მიხეილ სააკაშვილის ციხის საავადმყოფოდან სამედიცინო კლინიკაში გადაყვანის მოთხოვნის ირგვლივ მიმდინარე დისკუსიას.

"რაც უფრო მალე, ოპოზიცია იქნება ეს თუ ჩემნაირი პოლიტიკოსები, შევწყვეტთ საუბარს სამედიცინო თემებზე, მით უფრო კარგად იქნება დაცული ამა თუ იმ პატიმრის ინტერესი, ვინაიდან ჯანმრთელობა არის სამედიცინო საკითხი და არა პოლიტიკური [...] მთავარია, რომ თავად ექიმები, თუკი სხვადასხვა ჯგუფს შორის განსხვავებული აზრები არსებობს, ერთ კონკრეტულ აზრზე ჩამოყალიბდნენ. არასოდეს პენიტენციურ სამსახურში არ ყოფილა იმის პრობლემა და დარწმუნებული ვარ, არც ამ შემთხვევაში იქნება, რომ მედიკოსების აზრი ყოფილიყო გათვალისწინებული", — განაცხადა თეა წულუკიანმა.

გარდა ამისა, იუსტიციის ყოფილმა მინისტრმა პენიტენციური სამსახურის მე-18 სამედიცინო დაწესებულებას მხარდაჭერა გამოუცხადა.

მიხეილ სააკაშვილი 49-ე დღეა შიმშილობს. სააკაშვილი, მისი ადვოკატები და არასამთავრობო ორგანიზაციის წარმომადგენლები მის სამოქალაქო კლინიკაში გადაყვანას ითხოვენ, თუმცა ხელისუფლება უარზეა. 8 ნოემბერს ექსპრეზიდენტი მისი და მისი ადვოკატების სურვილის საწინააღმდეგოდ გლდანის ციხის სამკურნალო დაწესებულებაში გადაიყვანეს.

სტრასბურგის სასამართლოს გადაწყვეტილების შემდეგ მან განაცხადა, რომ შიმშილობას შეწყვეტს, თუ სამოქალაქო კლინიკაში გადაიყვანენ. პასუხად იუსტიციის მინისტრმა თქვა, რომ მოხარული იქნებიან თუ არ იშიმშილებს, მაგრამ დათქმების გარეშე.

17 ნოემბერს, სამედიცინო მომსახურების მონიტორინგის მიზნით, სახალხო დამცველმა სამედიცინო ექსპერტთა ჯგუფი წარადგინა. კონსილიუმი ციხის საავადმყოფოში იმავე დღეს შევიდა და ადგილზე მდგომარეობას 4 საათზე მეტი ხნის განმავლობაში შეისწავლიდა. მეორე დღეს მათ გამოაქვეყნეს დასკვნა, რომლის მიხედვითაც მიხეილ სააკაშვილის მდგომარეობა კრიტიკულია. ექიმების განცხადებით, მკურნალობის გაგრძელება რეკომენდებულია ფუნქციურად გამართულ და დიდი გამოცდილების მქონე პოლიპროფილურ ჰოსპიტალში.

გაიგე მეტი: