ქართული ოცნების თავმჯდომარე ირაკლი კობახიძე, აღმასრულებელი მდივანი მამუკა მდინარაძე და საზოგადოებასთან ურთიერთობის ხელმძღვანელი შალვა პაპუაშვილი პარლამენტში მოშიმშილე დროას ლიდერის, ელენე ხოშტარიას მოსანახულებლად მივიდნენ.

"შეხვედრა გვქონდა ელენე ხოშტარიასთან. დეტალებზე ვერ ვისაუბრებ, ჩვენ გავცვალეთ ინფორმაციაც, სხვადასხვ მოსაზრებებიც ამ ყველაფერთან დაკავშირებით, რაც პროცესებს უკავშირდება. ჩვენი თხოვნა მის მიმართ არის, რომ შეწყვიტოს შიმშილობა, ეს არის ჩვენი თხოვნა, შეგვიძლია საჯაროდაც გავაზიაროთ. გვქონდა მეგობრული საუბარი. ეს არის ის ინფორმაცია, რომელიც შემიძლია გავაზიარო", — განაცხადა კობახიძემ.

გუშინ, შიმშილობის მე-14 დღეს ელენე ხოშტარიას სანახავად ჯანდაცვისა და ადამიანის უფლებათა კომიტეტის წევრები, დიმიტრი ხუნდაძე, დავით სერგეენკო და მიხეილ სარჯველაძე მივიდნენ. მანამდე კი მის მოსანახულებლად იმყოფებოდნენ მმართველი პარტიის სხვა წარმომადგენლები დეპუტატი სოზარ სუბარი და პარლამენტის თავმჯდომარე კახა კუჭავა.

ელენე ხოშტარია მე-15 დღეა შიმშილობს და ექსპრეზიდენტის სამოქალაქო კლინიკაში გადაყვანას ითხოვს. ხოშტარია მკურნალობის მხოლოდ იმ ფორმებს თანხმდება, რაც კრიტიკული მაჩვენებლების გასაუმჯობესებლად არის საჭირო.