საქართველოს დემოკრატიული ინიციატივა (GDI) პრობლემურის უწოდებს შინაგან საქმეთა სამინისტროს დღევანდელ განცხადებას, რომლის თანახმად, უწყებამ გზის სავალი ნაწილის გადაკეტვის შემთხვევაში ადმინისტრაციული და სისხლის სამართლებრივი პასუხისმგებლობის დაწყება დააანონსა. GDI-ს სამოქალაქო და პოლიტიკური უფლებების პროგრამის დირექტორი მარი კაპანაძე On.ge-სთან აცხადებს, რომ დღევანდელი აქციები, როგორც წინა, უნდა განვიხილოთ არა ფორმალური გაგებით, არამედ იმ კონტექსტში, თუ რა კონტექსში იმართება ეს აქციები. მისივე თქმით, ყურადღება უნდა მივაქციოთ, წარსულ შემთხვევებში როგორი დამოკიდებულება ჰქონდა შსს-ს გზის გადაკეტვასთან დაკავშირებით.

"გზის გადაკეტვის აქციებთან დაკავშირებით სისხლის სამართლებრივი მიდგომა აქამდე არ განუხორციელებია წარსულში, რაც მე მახსოვს ყოველშემთხვევაში. ნამახვანჰესის დროსაც ხდებოდა გზის გადაკეტვა, მათ შორის თბილისში, თვითონ ადგილზე და კახეთშიც გზას ხშირად კეტავენ იქაური ფერმერები. თუმცა არცერთ შემთხვევაში სახელმწიფოს არ უთქვამს, ვაპირებ სისხლის სამართლებრივი წესით ადამიანებს დავსაჯო ამისთვის. დღეს ვხედავთ განსხვავებულ განცხადებას, წინასწარ აფრთხილებს აქციის მონაწილეებს სახელმწიფო, რომ ის ბევრად უფრო მკაცრი იქნება დღეს და გარდა ადმინისტრაციული დაკავებებისა, ჩვენ შეიძლება ვიხილოთ სისსხლის სამართლებრივი გამოძიების დაწყებაც. ამიტომ, ეს არის პრობლემური, შერჩევითი მიდგომა აქვს სახელმწიფოს და მხოლოდ მაშინ ხედავს დანაშაულის ნიშნებს, როდესაც მისთვის პოლიტიკურად ემოციური საკითხია, ამ შემთხვევაში მათ ბევრად უფრო მკაცრი დამოკიდებულება აქვთ, მაშინ, როცა წარსულში ეს მიდგომა არ ჰქონია", — ამბობს კაპანაძე On.ge-სთან.

რაც შეეხება პროპორციულ ძალასა და სპეციალურ საშუალებების შესაძლო გამოყენებას, GDI-ს წარმომადგენელი აცხადებს, რომ ამის თქმა წინასწარ რთულია, მაგრამ აღნიშნავს, რომ წარსული გამოცდილებების გათვალისწინებით, მოლოდინი უფრო მეტად სკეპტიკურია.

დღეს ოპოზიციის მიერ დაანონსებულ აქციაზე შსს-მ განაცხადა, რომ კანონის თანახმად, ტრანსპორტის სავალი ნაწილის გადაკეტვა დაუშვებელია და ამ წესის დარღვევა გამოიწვევს პასუხისმგებლობას ადმინისტრაციულ სამართალდარღვევათა კოდექსის შესაბამისად. უწყების განცხადებით, აღნიშნული აქციის გაცხადებული მიზანი თბილისში სატრანსპორტო კოლაფსის გამოწვევაა. შსს-ს თანახმად, საჭიროების შემთხვევაში, საზოგადოებრივი წესრიგის აღდგენის მიზნით, კანონით გათვალისწინებულ პროპორციულ ძალასა და სპეციალურ საშუალებებს გამოიყენებენ.

ნაციონალური მოძრაობის თავმჯდომარე ნიკა მელიამ გუშინ თბილისის ორივე სანაპიროზე გზის გადაკეტვა დააანონსა. აქციის მონაწილეები 14:00 საათზე მეტრო ავლაბართან შეიკრიბებიან, რის შემდეგ მოეწყობა მსვლელობა და გადაიკეტება საავტომობილო მოძრაობა თბილისის ორივე სანაპიროზე.

მელიას თქმით, ესმის, რომ ეს გარკვეულ დისკომფორტს შეუქმნის მოქალაქეებს, მაგრამ აღნიშნა, რომ ეს არის ძლიერი გამაფრთხილებელი სიგნალი რეჟიმისთვის, რომ არაძალადობრივი საპროტესტო მოძრაობა ყოველ დღე უფრო მწვავე გახდება.