ილონ მასკის კომპანია SpaceX-მა წარმატებით გაუშვა მეორადი რაკეტა Falcon 9, რომელმაც კომერციული ტვირთი, ხელოვნური თანამგზავრი, ორბიტაზე გაიყვანა და მისიის შესრულების შემდეგ უსაფრთხოდ დაბრუნდა დედამიწაზე.

ამ მისიის შედეგად უკვე პრაქტიკულად დამტკიცდა, რომ კოსმოსური მისიების განსახორციელებლად მეორადი რაკეტების გამოყენება რეალურია. მრავალჯერადი გამოყენების რაკეტების დამსახურებით კოსმოსში გამგზავრებისა და ტვირთის გაგზავნის ხარჯები საგრძნობლად მცირდება, დაზოგილი თანხების ამავე სფეროში რეინვესტირებით კი კოსმოსური მგზავრობა ბევრად უფრო სწრაფად განვითარდება.

წარმატებულ მისიას ტვიტერზე ილონ მასკიც გამოეხმაურა:

"ვამაყობ SpaceX-ის გუნდით, რომელმაც ეს უმნიშვნელოვანესი ეტაპი გადალახა. შემდეგი მიზანი რაკეტის დაბრუნებიდან 24 საათში ახალ მისიაში გაშვებაა", წერს მასკი.