ტორესა მოსი აცხადებს, რომ საკონსტიტუციო სასამართლოში გაასაჩივრებს ადმინისტრაციულ სამართალდარღვევათა კოდექსის ნორმას, რომელიც პოლიციას 48-საათით დაკავების საშუალებას აძლევს. მისი თქმით, ამას გააკეთებს რადგან მავნე პრაქტიკაა და არა იმიტომ, რომ თავს დასჯილად გრძნობს. მწერალი ამბობს, რომ იზოლატორში ყოფნის ორი დღე სასარგებლოდ გამოიყენა და რომანის გაგრძელება მოიფიქრა.

"თავისი ჭკუით ასე დამსაჯეს, 48 საათი მაყურყუტეს წინასწარი დაკავების იზოლატორში, მაქსიმალური დრო, აბსოლუტურად უსაფუძვლოდ. მე ვაპირებ, რომ საკონსტიტუციო სასამართლოში გავასაჩივრო ეს ნორმა, რადგან აბსოლუტურად წარმოუდგენელია და სამარცხვინოა ეს განაწესი ადმინისტრაციულ სამართალდარღვევათა კოდექსში, არ შეესაბამება კონსტიტუციას და ლახავს ადამიანის თავისუფლებას. [...]

ეს პრაქტიკა უნდა დავასრულოთ და არა იმიტომ, რომ მე დასჯილად ვგრძნობ თავს, მშვენივრად გავატარე ორი დღე საკუთარ თავთან და მოვიფიქრე ჩემი რომანის გაგრძელების ბევრი ვერსია. ყოველთვის მოვახერხებ ჩემკენ ნასროლი ლიმონებისგან ლიმონათის გაკეთებას", — განაცხადა მან სასამართლო დარბაზიდან გათავისუფლების შემდეგ მთავარ არხთან.

მისივე განცხადებით, ხელისუფლება არის დამფრთხალი და მიმართავს რეპრესიებს, რითიც აჩვენებს, რომ გამიზნულად იქცევა უსამართლოდ და საფრთხის ქვეშ აყენებს სამოქალაქო მშვიდობას. ტორესა მოსი აცხადებს, რომ პროტესტი არ შეწყდება.

მწერალი ტორესა მოსი 12 ნოემბერს დააკავეს, როცა გირჩი — მეტი თავისუფლების წევრებმა 6 ქალაქში სახელმწიფო უსაფრთხოების სამსახურის შენობებთან აქციები გამართეს და მანქანებით შესასვლელი ჩახერგეს. შესასვლელის გასათავისუფლებად სამართალდამცავებმა ევაკუატორით მანქანები, შიგნით მყოფი პოლიტიკოსებიანად, ადგილიდან გაიყვანეს.

დღეს, 14 ნოემბერს ტორესა მხარდასაჭერად აქცია გაიმართა. მწერალთა სახლთან მწერლები და გამომცემლები შეიკრიბნენ, მისი დაპატიმრება გააპროტესტეს და დაუყოვნებლივ გათავისუფლება მოითხოვეს.

დღესვე ტორესა მოსი ხელწერილის საფუძველზე სასამართლო დარბაზიდან გაათავისუფლეს. მისი პროცესი განხილვისთვის 19 ნოემბერს გადაიდო.