დეკანოზი თამაზ ლომიძე მიმართავს ხელისუფლებას, მოიქცეს სულგრძელად, აჩვენოს კაცთმოყვარეობა და არ დაუშვას, რომ საქართველოს მესამე პრეზიდენტის სიცოცხლეს საფრთხე შეექმნას. ის მოუწოდებს მთავრობას, გადაიყვანონ სააკაშვილი სამოქალაქო კლინიკაში.

"მივმართავ საქართველოს ხელისუფლებას: ნუ გაიმეორებთ 30 წლის წინანდელ ტრაგედიას, მოიქეცით სულგრძელად და ქრისტიანულად, აჩვენეთ კაცთმოყვარება, არ დაუშვათ, რომ საქართველოს მესამე პრეზიდენტის სიცოცხლეს საფრთხე შეექმნას პატიმრობაში, ადგილს ნუ დაუთმობთ შურისძიებას და ბოროტებას, თორემ ტალღასავით მოედება ეს ბოროტება მთელ ქვეყანას და გაგვანადგურებს ყველას. გადაიყვანეთ დაუძლურებული პრეზიდენტი საავადმყოფოში და აღმოუჩინეთ დახმარება. ყველაფერი წარმავალი და დროებითია ამ ქვეყანაზე და საქართველოს მომავალი არ გვაპატიებს ამ ცოდვას!" — წერს ის.

დეკანოზმა ექსპრეზიდენტის მხარდამჭერი პოზიცია აქამდეც დააფიქსირა, მან ხელი მოაწერა პეტიციას სააკაშვილის გათავისუფლების მოთხოვნით.

ექსპრეზიდენტი უკვე 45-ე დღეა შიმშილობს. როგორც მისმა ექიმმა, ნიკოლოზ ყიფშიძემ განაცხადა, სააკაშვილს ძლიერი სისუსტე აქვს და დღეს პირველი დღეა, როცა ის ფეხზე ვერ ადგა.