ოჯახის წევრები ამტკიცებენ, რომ სამართალდამცავები შოთა პაკელიანს დაკავებისას ფიზიკურად გაუსწორდნენ, რის გამოც ის საავადმყოფოში ოთხი დღის განმავლობაში უგონო მდგომარეობაში იმყოფებოდა.

თავის მხრივ, შინაგან საქმეთა სამინისტრო ამტკიცებს, რომ თავად ბრალდებულს პოლიციის მიმართ პრეტენზია არ გააჩნია.

შინაგან საქმეთა სამინისტრო მომხდარის შესახებ თავის ვერსიას ავრცელებს, სადაც წერია:

"მიმდინარე წლის 23 მარტს თბილისში, პოლიციელებმა, ოპერატიული ინფორმაციის საფუძველზე, გადამოწმების მიზნით, შეაჩერეს ამჟამად პირობითი მსჯავრის ქვეშ მყოფი შოთა პაკელიანი, რომელიც არ დაემორჩილა სამართალდამცველთა კანონიერ მოთხოვნას და მიმალვა სცადა, რა დროსაც წაიქცა და სხეულზე (სახის, ხელის და მუხლის არეში) მიიღო დაზიანებები. პოლიციამ, შოთა პაკელიანის პირადი ჩხრეკისას, 0,0664 გრამი ნარკოტიკული საშუალება - ე.წ. ბიო ამოიღო.

პოლიციის განყოფილებაში მიყვანის შემდეგ დაკავებული შეუძლოდ გახდა, რის გამოც გამოძახებული იქნა სასწრაფო სამედიცინო დახმარების ბრიგადა და იგი თბილისის N1 კლინიკურ საავადმყოფოში გადაიყვანეს.

საავადმყოფოში შოთა პაკელიანმა მორიგე ექიმს განუცხადა, რომ მას ე.წ. ბიო ჰქონდა გადაყლაპული.

ბრალდებულის სახით დაკითხვისას პაეკლიანმა განაცხადა, რომ ნარკოტიკული საშუალება იპოვა და როდესაც პოლიციელები მის შეჩერებას ცდილობდნენ, აღნიშნული ნარკოტიკის ნაწილი მიმალვის მცდელობის დროს გადაყლაპა, რის გამოც შემდგომში შეუძლოდ გახდა.

რაც შეეხება სხეულზე არსებულ დაზიანებებს, ბრალდებულის განმარტებით, მან ეს დაზიანებები მიმალვის დროს, წაქცევის შედეგად მიიღო. იგი აცხადებს, რომ პოლიციის მიმართ პრეტენზია არ გააჩნია.

მიმდინარე წლის 29 მარტს შოთა პ.-ს ბრალი წარედგინა საქართველოს სსკ-ს 260-ე მუხლის მე-3 ნაწილის „დ“ და „ე“ ქვეპუნქტებით. თბილისის საქალაქო სასამართლოს მიერ აღკვეთის ღონისძიების სახით მას პატიმრობა შეეფარდა".

როგორც უწყება აცხადებს, შოთა პაკელიანი ანალოგიური დანაშაულისთვის 2016 წელსაც იყო დაკავებული. მათივე თქმით, პოლიციის მიმართ მისი მხრიდან რაიმე სახის პრეტენზიის არსებობის შემთხვევაში, საქმის მასალები გამოსაძიებლად პროკურატურას გადაეცემა.

პაკელიანის ადვოკატის თქმით, ბრალდებული აღიარებს ნარკოტიკის მიღებას, თუმცა, მას ნარკოტიკული საშუალება თან არ ჰქონია. ადვოკატისვე თქმით, პაკელიანს სამართალდამცავები ცემით აიძულებდნენ აღიარებითი ჩვენების მიცემას. რუსთავი 2-თან ინტერვიუში პოლიციის მხრიდან ძალადობაზე საუბრობს პაკელიანის მამაც.