ცენტრალური საარჩევნო კომისიის შემაჯამებელი სხდომის პარალელურად შენობასთან აქცია იმართება. აქციის მონაწილეების თქმით, ისინი ცესკოს მონაცემებს აპროტესტებენ.

"დღეს არის ცესკოს შემაჯამებელი სხდომა და ყველამ ნათლად დავინახეთ, თუ როგორ ჩაატარა ცესკომ 2021 წლის არჩევნები. ცესკომ კიდევ ერთხელ დაგვიმტკიცა, რომ ამ ქვეყანაში არჩევნები არ ტარდება, ამ ქვეყანაში არჩევნებს აყალბებენ, იპარავენ, ჩვენი ხმის უფლებას იპარავენ, საარჩევნო უფლებას იპარავენ და ერთხელ და სამუდამოდ ჩვენ ეს მანკიერი ქმედებები ამ ხელისუფლებისა და ამ სისტემის უნდა დავასრულოთ, რა თქმა უნდა, ქართველ ხალხთან ერთად", — განაცხადა მოძრაობა შეცვალეს წევრმა, ტიტე გედენიძემ აქციაზე.

ოპოზიციის აქციები რამდენიმე დღეა იმართება. 8 ნოემბერს ექსპრეზიდენტის, მიხეილ სააკაშვილის მხარდასაჭერ აქციაზე ნიკა მელიამ უწყვეტი პროტესტი დააანონსა. მოგვიანებით, მან უფრო დეტალურად ისაუბრა სამომავლო გეგმებსა და სტრატეგიაზე.

მელიას თქმით, ყოველი დღის ბოლოს მომდევნო დღის გეგმების შესახებ გახდება ცნობილი და საზოგადოებას საპროტესტო აქციების ლოკაციებს შეატყობინებენ. თუმცა ენმ-ს თავმჯდომარის განცხადებით, ყოველთვის იქნება ერთი წერტილი, რომელსაც არ დაასახელებენ. მისი განმარტებით, ხელისუფლებას ძველი მიდგომით "ამოსუნთქვის საშუალებას" აძლევდნენ, თუმცა ახლა საპირისპიროდ იმოქმედებენ.