საქართველოს მე-4 პრეზიდენტის, გიორგი მარგველაშვილის განცხადებით, გუშინ რუსულმა მთავარმა პროპაგანდისტულმა წყარომ ქართველებისგან ძალიან უღირსი საჩუქარი მიიღო.

"ერთი რამე შემიძლია გითხრათ, რომ გუშინ რუსულმა მთავარმა პროპაგანდისტულმა წყარომ ქართველებისგან მიიღო ძალიან უღირსი საჩუქარი. მე ქართული აუდიტორიისთვის არ ვაკეთებდი, მაგრამ რუსებმა მინდა იცოდნენ, რომ ქართველები არ ვართ გატეხილები და ქართველები მაგ მდგომარეობაში არ ვართ, რომ რუსებს ასეთ საჩუქრებს ვუფუთავთ, რომ საქართველოში, პირიქით, ჩვენი ეროვნული ღირსების კონსოლიდაცია ხდება მაშინ, როდესაც ის დაგვცინიან. კი, გვტკივა, მაგრამ კიდევ უფრო ქართველებად ვგრძნობთ თავს", — განაცხადა მან TV პირველის ეთერში.

მარგველაშვილმა დღეს ტვიტერის საშუალებით მიმართა რუსეთის იმ მოქალაქეებს, რომლებიც ექსპრეზიდენტ მიხეილ სააკაშვილზე გავრცელებულ კადრებზე იცინიან და თქვა, რომ ეს ქართველებმა გააკეთეს, თუმცა ამ ქართველებს რუსეთი უხდის.

11 ნოემბერს პენიტენციურმა სამსახურმა გაავრცელა კადრები, რომლებშიც ჩანს, რომ მიხეილ სააკაშვილი გლდანის ციხის სამკურნალო დაწესებულებაში ძალის გამოყენებით გადაჰყავთ. კადრების მიხედვით, სააკაშვილი სასწრაფო დახმარების მანქანიდან იძულებით გამოიყვანეს, ძალით შეიყვანეს შენობის დერეფნებსა და ლიფტშიც, კერძოდ, ფეხებსა და ხელებში ჩაავლეს ხელი, რა დროსაც ტანსაცმელი თითქმის გახდილი აქვს. ექსპრეზიდენტი ციხის საავადმყოფოს პალატაში უკვე წელზევით შიშველი შეიყავნეს და პირდაპირ იატაკზე დასვეს.

ამ ვიდეოს გამოქვეყნდებიდან რამდენიმე საათში პენიტენციურმა სამსახურმა მეორე ვიდეო გამოაქვეყნა, სადაც მიხეილ სააკაშვილი უკვე გაჩერებულ სასწარაფო დახმარების მანქანაშია და ამბობს, რომ არ გადმოვა. ის რუსთავის ციხეში დაბრუნებას ითხოვს. უწყება აქამდე ამტკიცებდა, რომ სააკაშვილმა რუსთავის დაწესებულება თავისი ნებით დატოვა.

პენიტენციური სამსახური ამ ვიდეოს გამოქვეყნებასაც მაღალი საზოგადოებრივი ინტერესით ხსნის. უწყების განცხადებით, "კადრებში ნათლად ჩანს, როგორ არ ემორჩილება [სააკაშვილი] დაწესებულების თანამშრომლების კანონიერ მითითებებს, იქცევა აგრესიულად და მათ სიტყვიერ შეურაცხყოფას აყენებს".

ექსპრეზიდენტის იძულებით შეყვანის ვიდეოს გავრცელებამდე იუსტიციის მინისტრმა განაცხადა, რომ კადრებს იმის უარსაყოფად გამოაქვეყნებდნენ, რასაც სააკაშვილის ადვოკატი, ნიკა გვარამია ამტკიცებდა. მისი თქმით, გვარამიას განცხადება, დაწესებულებაში სააკაშვილის იძულებით შეყვანისა და იმის შესახებ, რომ სხვა პატიმრებს წინასწარ ჰქონდათ ინფორმაცია, სიცრუეა და ამ სიცრუეს "სულ რამდენიმე წამში" ამხელდნენ.

ასევე, გუშინ მიხეილ სააკაშვილის წერილი გავრცელდა, სადაც ის წერს, რომ როგორც კი სათანადო დაწესებულებაში გადაიყვანენ, შიმშილობას შეწყვეტს.