საქართველოს ზღვისპირა ქალაქი ბრიტანული ავტოგიგანტის ინსპირაციის წყარო გახდა. Jaguar Land Rover-მა მსოფლიოს ყველაზე მოთხოვნადი, Range Rover-ის ახალი მოდელი წარუდგინა, რომლის ერთ-ერთ ძვირადღირებულ ფერს დიზაინერებმა Batumi Gold უწოდეს.

როგორც ჩანს, Range Rover-ის შემოქმედებითი გუნდი ბათუმის შთამბეჭდავი ხედებითა და მზის ჩასვლით მოიხიბლა. ავტომობილის ახალი ფერი სწორედ ზღვაში ჩამავალ მზესთან ასოცირდება.

ფოტო: Range Rover

თუმცა, საქართველოს ზღვისპირა ქალაქის სილამაზე არ იყო ერთადერთი მიზეზი, რის გამოც ქვეყანამ ბრიტანული ავტოგიგანტის ყურადღება მიიქცია. მნიშვნელოვანი როლი ითამაშა Jaguar Land Rover-ის საქართველოს ოფისის წარმატებულმა მუშაობამაც. ოფისი ბოლო ორი წლის განმავლობაში რეგიონში წამყვან პოზიციას იკავებს და ტოპ ხუთ ქვეყანაში შედის. აღსანიშნავია წარმატება მომხმარებელთა მომსახურების კუთხითაც. ამ მიმართულებით Jaguar Land Rover-ის საქართველოს ოფისი რეგიონის პირველ სამეულში მოხვდა. ამ ყველაფრის გათვალისწინებით, ავტოსამყაროს ერთ-ერთ ყველაზე მნიშვნელოვან ღონისძიებაზე ბათუმის სახელი გაჟღერდა და ქალაქი მსოფლიო რუკაზე კიდევ ერთხელ მოინიშნა.

ფოტო: Range Rover

Range Rover Batumi Gold სხვა ფერებთან შედარებით ერთ-ერთი ყველაზე ძვირადღირებულია. განახლებული მოდელის ძირითადი კლასიკური მახასიათებლები შენარჩუნებულია. ამიტომ, ნებისმიერი ადამიანი ერთი შეხედვით მიხვდება, რომ Range Rover-ს უყურებს. თუმცა, დიზაინი მოდერნიზებულია, სტილი კი მეტად დახვეწილი და მინიმალისტური. ავტომოყვარულები ამბობენ, რომ Range Rover-ის არსებობის ისტორიის მანძილზე, განახლებული მოდელი ყველაზე კომფორტული და მდიდრული SUV-ია.

ავტომობილი აღჭურვილია უახლესი ტექნოლოგიებით და ოპერაციული სისტემა ფაქტობრივად იმავე ფუნქციებს ასრულებს, რასაც ნებისმიერი კარგი სმარტფონი. აღსანიშნავია, რომ სპეციალურად ამ მოდელის ტექნიკური აღჭურვისთვის 125 ახალი პატენტი შეიქმნა. მაგალითად, Range Rover-ში დაგხვდებათ სმარტფონის Wireless დამტენი, რომელშიც სიგნალის გამაძლიერებელია დამონტაჟებული. ჰაერის წმენდისა და ხმის იდეალური იზოლაციის უნიკალური სისტემები კი ახალ Range Rover-ს კიდევ უფრო სასურველს ხდის.

ფოტო: Range Rover

ფოტო: Range Rover

რაც შეეხება ტექნიკურ დეტალებს — წინა მოდელებთან შედარებით, ახალი Range Rover 12%-ით უფრო აეროდინამიკული, 24%-ით ნაკლებად ხმაურიანი და 50%-ით გამძლეა. ნოვაციაა ისიც, რომ საჭის დატრიალებისას, ავტომობილის ოთხივე თვალი მოძრაობს. შესაბამისად, ახალი Range Rover მარტივად მანევრირებს ქალაქში, პარკინგსა და ვიწრო გზებზეც.

Range Rover-ის ახალი მოდელი საქართველოში ხელმისაწვდომი 2022 წლის გაზაფხულიდან იქნება.