ევროპულ საქართველო აპირებს, რომ მოსმენების შესახებ კანონი საკონსტიტუციო სასამართლოში გაასაჩივროს. ამის შესახებ პარტიის წევრმა, გიორგი ტუღუშმა განაცხადა.

ტუღუშის თქმით, ქართულმა ოცნებამ მიიღო კანონი, რომელმაც სახელმწიფო უსაფრთხოების სამსახურს უფლებები გაუზარდა და არ შეასრულა საკონსტიტუციო სასამართლოს გადაწყვეტილება:

"ნებისმიერ შემთხვევაში, როდესაც სუს-ს მოუნდება ჩვენი მოსმენა და პირად სივრცეში შემოსვლა ამას განახორციელებს კონტროლის და შეზღუდვის გარეშე", - განაცხადა ტუღუშმა.

საკონსტიტუციო სასამართლოს, შესაძლოა, მეორედ მიმართონ ომბუდსმენმა და არასამთავრობო ორგანიზაციებმაც.

საკონსტიტუციო სასამართლომ, მოსმენების შესახებ კანონი არაკონსტიტუციურად სცნო. სასამართლომ ახალი კანონის მისაღებად პარლამენტს დრო 31 მარტამდე მისცა. პარლამენტმა ახალი კანონი 2 მოსმენით მიიღო, რასაც პრეზიდენტის ვეტო მოჰყვა. პარლამენტმა პრეზიდენტის შენიშვნები არ გაითვალისწინა და ვეტო დაძლია. მარგველაშვილს კანონთა ორი ძირითადი პრეტენზია ჰქონდა:

  • პირველი, ეს არის სააგენტოს დამოუკიდებლობა, რომელიც წარმოდგენილი კანონპროექტით არ არის უზრუნველყოფილი და შესაბამისად, ეწინააღმდეგება ამ საკითხზე საკონსტიტუციო სასამართლოს გადაწყვეტილებას;
  • მეორე ეს არის კანონპროექტში გაუმართლებელი და არაპროგნოზირებადი ხარჯები, რომელსაც ეს კანონპროექტი აკისრებს საკომუნიკაციო კომპანიებს.

მოგვიანებით პრეზიდენტის საპარლამენტო მდივანმა, ანა დოლიძემ განაცხადა, რომ მარგველაშვილი საკონსტიტუციო სასამართლოს პატივისცემიდან გამომდინარე მოაწერს კანონს ხელს.