სახალხო დამცველი აცხადებს, რომ მნიშვნელოვანია ექსპრეზიდენტ მიხეილ სააკაშვილს ექსპერტიზა სწრაფად ჩაუტარდეს, რადგან დაზიანებების კვალი დროთა განმავლობაში ქრება. ნინო ლომჯარია განმარტავს, რომ გუშინ სააკაშვილმა უარი თქვა შეემოწმებინათ მის სხეულზე დაზიანებები, რადგან გლდანის ციხეში იძულებით შეიყვანეს და ექიმებს არ ენდობოდა.

"პრაქტიკა ასეთია და სტანდარტი, როდესაც პირს აკავებენ, იქნება ეს დროებითი მოთავსების იზოლატორში თუ ციხეში ე.წ. შესახლების დროს, მან უნდა გაიაროს სამედიცინო შემოწმება, მოხდეს მისი სხეულებრივი დათვალიერება. [...] მოგეხსენებათ გუშინ როგორც განვითარდა მოვლენები, მისი ნების საწინააღმდეგოდ გადაიყვანეს მიხეილ სააკაშვილი ციხის სამედიცინო დაწესებულებაში, აქედან გამომდინარე, ის უნდობლობას უცხადებდა მე-18 დაწესებულების თანამშრომლებს და პერსონალს და საღამოს, გვიან, როდესაც მე მას ვესაუბრე, ის აცხადებდა უარს, რომ ექიმებს დაეთვალიერებინათ მის სხეულზე დაზიანებები და შესაბამისად, გუშინ ეს ვერ მოხერხდა.

თუმცა, ვერ გეტყვით დღეს ეს გადაწყვეტილება მან რატომ მიიღო. ძალიან მნიშვნელოვანია, რომ დროულად მოხდეს დაზიანებების დოკუმენტირება, რა თქმა უნდა, თითოეული დღე არის მნიშვნელოვანი", — განაცხადა მან ფორმულას ეთერში.

გუშინ, 8 ნოემბერს, მას შემდეგ რაც ექსპრეზიდენტი გლდანის ციხის კლინიკაში გადაიყვანეს, მან წერილი დაწერა და განაცხადა, რომ დაწესებულებაში შეყვანისას ფიზიკური შეურაცხყოფა მიაყენეს, თმებით ათრიეს და კისერში ჩაარტყეს. 9 ნოემბერს სახელმწიფო ინსპექტორის სამსახურმა სახალხო დამცველის მიმართვის, ასევე, მედიით გავრცელებული ინფორმაციის შემდეგ, მიხეილ სააკაშვილის მიმართ შესაძლო არაადამიანური მოპყრობის საქმეზე გამოძიება დაიწყო.

როგორც ინსპექტორის სამსახურის გამომძიებელმა განაცხადა, სააკაშვილმა მის მიერ მიწოდებული ექსპერტების მონაწილეობით სამედიცინო ექპერტიზის ჩატარებაზე თანხმობა განაცხადა. სააკაშვილის ადვოკატის, ნიკა გვარამიას ინფორმაციით, იუსტიციის სამინისტროს გენინსპექციის საგამოძიებო დეპარტამენტმა იცოდა, რომ ინსპექტორის აპარატი მტკიცებულებად სააკაშვილის ტანსაცმლის ამოღებას აპირებდა, ამიტომ ექსპრეზიდენტი შეცდომაში შეიყვანეს. კერძოდ, მისი თქმით, სააკაშვილმა ჩათვალა, რომ ინსპექციის ხალხი ინსპექტორის სამსახურიდან იყო, ხელი მოუწერა და მათ ტანსაცმელი წაიღეს.