ექსპრეზიდენტის, მიხეილ სააკაშვილის ადვოკატის, ნიკა გვარამიას განცხადებით, იუსტიციის სამინისტროს გენინსპექციის საგამოძიებო დეპარტამენტი მტკიცებულებას იპარავდა. მისი თქმით, ტანსაცმლის ამოღების პროცესის დროს სააკაშვილი შეცდომაში შეიყვანეს.

"მათ იცოდნენ, რომ ინსპექტორის წარმომადგენელი შემოდიოდა ტანსაცმლის ამოსაღებად იმისთვის, რომ ტანსაცმელზე შემოწმდეს კვალი. რა ქნა, იუსტიციის სამინისტრომ? დაასწრო და დაიწყო ამოღების პროცესი, შეიყვანეს შეცდომაში სააკაშვილი, რომელსაც ეძინა და გააღვიძეს, სააკაშვილმა ჩათვალა, რომ ეს ინსპექტორის ხალხია და მოუწერა ხელი, ახლა გავაფრთხილეთ, რომ არავის არ მოუწეროს ჩვენს გარეშე, გადააბარა ეს ტანსაცმელი და როგორც კი ტელევიზორში ნახა, რომ გარეთ ვდგავართ ჩვენ იკითხა: "აბა თქვენ ვინ ხართო", იმათ უთხრეს, რომ იუსტიციის გენინსპექცია ვართო, არც აცია, არც აცხელა, მთელი ტანსაცმელი გამოართვა და აღარ შედგა ეს საპროცესო მოქმედება", — აცხადებს ის.

დღეს სახელმწიფო ინსპექტორის სამსახურის წარმომადგენელი გლდანის ციხის სამკურნალო დაწესებულებაში იმყოფებოდა. როგორც სახელმწიფო ინსპექტორის სამსახურის გამომძიებელმა, გიორგი მიქელაძემ განაცხადა, ექსპრეზიდენტმა, მიხეილ სააკაშვილმა მის მიერ მოწოდებული ექსპერტების მონაწილეობით სამედიცინო ექპერტიზის ჩატარებაზე თანხმობა განაცხადა.

რაც შეეხება გამოკითხვას, მისი თქმით, დღეს ეს ვერ ჩატარდა კორონავირუსის გავრცელების პრევენციის მიზნით ციხეში არსებული რეგულაციების გამო. როგორც მიქელაძემ განმარტა, გამოკითხვის ჩატარების ალტერნატიულ გზებზე მუშაობენ.

დღეს სახელმწიფო ინსპექტორის სამსახურმა სახალხო დამცველის მიმართვის, ასევე, მედიით გავრცელებული ინფორმაციის შემდეგ, მიხეილ სააკაშვილის მიმართ შესაძლო არაადამიანური მოპყრობის საქმეზე გამოძიება დაიწყო.