BBC-ის მიხედვით, შეერთებული შტატების პრეზიდენტობის რესპუბლიკელ კანდიდატს დონალდ ტრამპს, პარტიის საპრეზიდენტო ნომინაციისთვის საკმარისი დელეგატების ხმები აქვს.

ტრამპმა, რომელმაც კამპანია გასულ წელს დაიწყო, პრეზიდენტობისთვის მებრძოლი 16 სხვა რესპუბლიკელი დაამარცხა და სულ 1 238 დელეგატის მხარდაჭერა მოიპოვა, რაც საჭირო რაოდენობაზე ერთით მეტია. ხმების ეს რაოდენობა სრულიად საკმარისია იმისთვის, რომ ის ოფიციალურად დასახელდეს პრეზიდენტობის კანდიდატად.

რესპუბლიკური პარტიის ყრილობა ივლისში კლივლენდში გაიმართება, სადაც საბოლოოდ დაასახელებენ საპრეზიდენტო კანდიდატს. ტრამპს კონკურენტი არ ჰყავს.

აშშ-ში საპრეზიდენტო არჩევნები 2016 წლის 8 ნოემბერს გაიმართება, მანამდე კი ყველა შტატში ტარდება პრაიმერი. ბოლო პრაიმერი ივნისშია დაგეგმილი, სადაც საბოლოოდ გადაწყდება ვინ გახდება როგორც რესპუბლიკური, ისე დემოკრატიული პარტიის პრეზიდენტობის კანდიდატი.