დროას ლიდერი ელენე ხოშტარია პარლამენტში მამამ მოინახულა. მამის თქმით, ხოშტარია დასუსტებულია, როგორც შიმშილობის მეხუთე დღეს იყო მოსალოდნელი, მაგრამ საგანგაშო მდგომარეობა არ არის.

მანვე აღნიშნა, რომ გააგრძელებს თუ არა შიმშილობას, მხოლოდ ელენეს გადასაწყვეტია და ის შვილით ძალიან ამაყობს.

"ცხადია დასუსტებულია, მაგრამ, მადლობა ღმერთს, საგანგაშო მდგომარეობა არ არის. რაც შეეხება უნდა გააგრძელოს თუ რა შიმშილობა, ეს არის ხაზგასმულად პიროვნების ამბავი. ჩემი ქალიშვილია გასაგებია, მაგრამ, ჯერ ერთი, დიდი ხანია უკვე თვითონ იღებს გადაწყვეტილებებს, მითუმეტეს ისეთს, როგორიც არის შიმშილობა. ცხადია, მე მამა ვარ და ბუნებრივია, აბსოლუტურად ძალიან ვღელავ, ჩემზე არ არის დამოკიდებული. მაგრამ ვამაყობ ჩემი ქალიშვილით, ძალიან ვამაყობ", — განაცხადა გოგი ხოშტარიამ.

ელენე ხოშტარია, მეხუთე დღეა შიმშილობს. მისი მთავარი მოთხოვნაა, ექსპრეზიდენტი მიხეილ სააკაშვილი სამოქალაქო კლინიკაში გადაიყვანონ. ექიმის ინფორმაციით, ის იღებს მხოლოდ სითხეს და უარს ამბობს, ვიტამინებსა და სხვა მედიკამენტებზე.

დღეს, 7 ნოემბერს პარლამენტში სასწრაფო გამოიძახეს. ხოშტარია აცხადებს, რომ სასწრაფო დახმარება პარლამენტმა გამოიძახა და მას არ უთხოვია. მისი თქმით, სუსტად არის, მაგრამ დრამატული არაფერი ხდება.

სასწრაფოს ექიმის განცხადებით, ხოშტარიამ გადასხმაზე უარი თქვა. მისივე თქმით, სასიცოცხლო პარამეტრები ოდნავ შეიცვალა, მაგრამ ნორმის ფარგლებში რჩება.