ადამიანის უფლებათა დაცვის კომიტეტის თავმჯდომარე, მიხეილ სარჯველაძე, რომელმაც იუსტიციის სამინისტროს სააკაშვილის კვებაზე სადეპუტატო კითხვებით მიმართა, ამბობს, რომ მნიშვნელობა არ აქვს დისკუსიას იმაზე, უწყების გავრცელებულ კადრებში საჭმელი ჩანდა თუ საჭმელი. მისივე განცხადებით, ექსპრეზიდენტის კადრების გასაჯაროება საჭირო იყო საიმისოდ, რომ მოსახლეობა სწორად ყოფილიყო ინფორმირებული ამ საკითხზე, რაც მაღალი საზოგადოებრივი ინტერესის თემაა.

"ახლა დისკუსია იმის შესახებ საჭმელი იყო თუ სასმელი, თუ რა იყო, მე ვფიქრობ, რომ არსებითი მნიშვნელობა არ აქვს. რაც ყველაზე მნიშვნელოვანია, ის არის, რომ პაციენტის მდგომარეობა, ალბათ, უმჯობესია ვთქვათ პატიმრის მდგომარეობა არ არის ისეთი, როგორადაც ცდილობდა საზოგადოებისთვის წარმოეჩინა ზოგიერთ არასწორად მცხოვრებ პოლიტიკოსს. როდესაც ცდილობდნენ წარმოეჩინათ ისე, რომ მშრალი შიმშილობის შედეგად ადამიანი არის მომაკვდავი, მაშინ, როდესაც ასეთი ვითარება სრულებით არ არსებობს", — აცხადებს ის.

სააკაშვილი უკვე 38-ე დღეა შიმშილობს. 6 ნოემბერს, ექსპრეზიდენტის მხარდამჭერი აქციის დაწყებამდე, პენიტენციურმა სამსახურმა გაავრცელა კადრები, სადაც, მათი მტკიცებით, მიხეილ სააკაშვილი "საკვებს იღებს". უწყებამ ვიდეოს გამოქვეყნება "მაღალი საზოგადოებრივი ინტერესით" ახსნა. სააკაშვილის მხარდამჭერები და ექიმები განმარტავენ, რომ ეს სამედიცინო საკვები დანამატია, რაც მისი სიცოცხლის შესანარჩუნებლად არის საჭირო და არა საჭმელი.

ამ მოვლენებს წინ უძღოდა 5 ნოემბერს იუსტიციის მინისტრის განცხადება იმაზე, რომ სააკაშვილი შიმშილობის დაწყებიდან გარკვეული დროის შემდეგ ფაფებისა და ნატურალური წვენების მიღებას დათანხმდა. მინისტრის მტკიცებით, ეს ინფორმაცია დეპუტატის, კერძოდ, ადამიანის უფლებათა დაცვისა და სამოქალაქო ინტეგრაციის კომიტეტის თავმჯდომარის, მიხეილ სარჯველაძის კითხვის საფუძველზე გაასაჯაროა. ომბუდსმენმა განაცხადა, რომ სამინისტროს მიერ სააკაშვილის პირადი ინფორმაციის გამოქვეყნებას შეისწავლის.