დროას ლიდერი, ელენე ხოშტარია აცხადებს, რომ სახელმწიფო უსაფრთხოების განცხადება არის "პანიკა პროტესტზე". მისი თქმით, მწვავე პროტესტი აუცილებლად იქნება, თუმცა მშვიდობიანი.

"პირველი, ეს არის პანიკა პროტესტზე, მეორე — ეს არის პირდაპირი, კიდევ ერთი განაცხადი პარტიული კუთვნილების, იმიტომ, რომ პროტესტის უფლება აქვს აბსოლუტურად ყველას. ეს პროტესტი აუცილებლად იქნება, თუ ჩაითვლება საჭიროდ და რაოდენობა იქნება ხალხის გზაც გადაიკეტება, თუ ჰგონიათ, რომ ამ განცხადებით ვინმეს დააშინებენ, აბსოლუტურად გაუგებარია. აქამდეც არაერთხელ გადაგვიკეტია გზა, როცა ამის საჭიროება არის და დიახ, პროტესტი იქნება უწყვეტი.

რაც შეეხება პროტესტის ფორმას, ძალადობრივი, ჯერჯერობით, არის ხელისუფლება, ყველა თვალსაზრისით. ამიტომ ძალადობრივი ჩვენ დაგეგმილი არაფერი არ გვაქვს, მაგრამ მშვიდობიანი ძალიან მწვავე პროტესტი იქნება", — თქვა მან მთავარი არხის ჟურნალისტთან.

დღეს სახელმწიფო უსაფრთხოების სამსახურმა განაცხადა, რომ 6 ნოემბრიდან ნაციონალურ მოძრაობას, გარდა რუსთავისა, აქციები დაგეგმილი აქვს თბილისშიც. მათი მტკიცებით, ენმ აპირებს სახელმწიფო დაწესებულებების შენობების ბლოკირებას და რუსთავის ციხესთან გზის გადაკეტვას. სუს, ასევე, ამტკიცებს, რომ ნაციონალური მოძრაობა განიხილავს ერთ-ერთი ოპოზიციონერი ლიდერის ლიკვიდაციის შესაძლებლობასაც. მათი თქმით, ეს ყველაფერი ექსპრეზიდენტის, მიხეილ სააკაშვილის მიერ იგეგმება.

ნაციონალური მოძრაობის ლიდერმა, ნიკა მელიამ 6 ნოემბერს აქცია რუსთავში დააანონსა. მისი თქმით, 17:00 საათზე შეიკრიბებიან, თუმცა არ დაიშლებიან, სანამ ექსპრეზიდენტის, მიხეილ სააკაშვილს სამოქალაქო საავადმყოფოში არ გადაიყვანენ. აღსანიშნავია, რომ მანამდე, 6 ნოემბერს ოპოზიციას აქცია დაგეგმილი ჰქონდა თბილისში. როგორც მელიამ აღნიშნა, არჩევნებთან დაკავშირებული აქცია თბილისში ძალაში რჩება, თუმცა მისი თქმით, სააკაშვილის მდგომარეობის გართულების გამო, გეგმები "დროებით შეცვალეს".

სააკაშვილი პირველ ოქტომბერს დააკავეს. ის ბრალს არ აღიარებს და უკვე 37-ე დღეა შიმშილობს. მისი პირადი ექიმი აცხადებს, რომ ექსპრეზიდენტს ექიმების მეთვალყურეობა სჭირდება და საჭიროა სამოქალაქო კლინიკაში გადაყვანა. პენიტენციური სამსახური სააკაშვილს მხოლოდ ციხის კლინიკაში გადაყვანას სთავაზობს, რაზეც ყოფილი პრეზიდენტი უარს აცხადებს.

ოპოზიციამ აქციები უკვე გაიმართა სხვადასხვა ქალაქში, მათ შორის, ბათუმში, ზუგდიდსა და ქუთაისში. პარალელურად, მოქალაქეები ყოველდღიურად იკრიბებიან რუსთავის ციხესთან და მესამე პრეზიდენტის კლინიკაში გადაყვანას, ასევე, მის გათავისუფლებას ითხოვენ.