ნაციონალური მოძრაობის თავმჯდომარის, ნიკა მელიას განცხადებით, ხვალ აქციებს იწყებენ რუსთავის ციხესთან, სადაც ექსპრეზიდენტი მიხეილ სააკაშვილი შიმშილობს. მისი თქმით, 17:00 საათზე შეიკრიბებიან და არ დაიშლებიან, სანამ სააკაშვილს სამოქალაქო საავადმყოფოში არ გადაიყვანენ.

"ხვალ ჩვენ ძალიან ბევრნი უნდა შევიკრიბოთ რუსთავში, რუსთავის ციხესთან 5 საათზე, ძალიან ბევრი და ეს აქცია იქნება პერმანენტული და მზარდი. მაგრამ ხვალიდან ვიწყებთ დარჩენით, იქნება მზარდი, დრო და დრო ჩვენ შემოგვიერთდება ყველა ჩვენი პატრიოტი თანამოქალაქე, ყველა ქალაქიდან და ყველა რეგიონიდან. იქ ვიქნებით, მანამ, სანამ მიხეილ სააკაშვილს არ გადაიყვანენ სამოქალაქო სამედიცინო დაწესებულებაში", — განაცხადა მელიამ ბრიფინგზე.

აღსანიშნავია, რომ ხვალ 6 ნოემბერს ოპოზიციას აქცია დაგეგმილი ჰქონდა თბილისში. უცნობია, ისევ შეიკრიბებიან თუ არა ისინი დედაქალაქში. როგორც მელიამ აღნიშნა, დამატებით გეგმებზე ის მოგვიანებით ისაუბრებს, რადგან არ სურს, რომ "ივანიშვილის დამნაშავე ხელისუფლებას ცხოვრება გაუადვილოს". მისივე თქმით, სააკაშვილის სამოქალაქო, მულტიფუნქციურ კლინიკაში უნდა გადაიყვანონ მანამ, სანამ ის "კოლაფსში ჩავარდება".

სააკაშვილი პირველ ოქტომბერს დააკავეს. ის ბრალს არ აღიარებს და უკვე 36-ე დღეა შიმშილობს. მისი პირადი ექიმი აცხადებს, რომ ექსპრეზიდენტს ექიმების მეთვალყურეობა სჭირდება და საჭიროა სამოქალაქო კლინიკაში გადაყვანა. პენიტენციური სამსახური სააკაშვილს მხოლოდ ციხის კლინიკაში გადაყვანას სთავაზობს, რაზეც ყოფილი პრეზიდენტი უარს აცხადებს.

ოპოზიციამ აქციები უკვე გაიმართა სხვადასხვა ქალაქში, მათ შორის, ბათუმში, ზუგდიდსა და ქუთაისში. პარალელურად, მოქალაქეები ყოველდღიურად იკრიბებიან რუსთავის ციხესთან და მესამე პრეზიდენტის კლინიკაში გადაყვანას, ასევე, მის გათავისუფლებას ითხოვენ.