პატრიარქის მდივანი მიქაელ ბოტკოველი აცხადებს, რომ ექსპრეზიდენტ მიხეილ სააკაშვილთან პატრიარქ ილია მეორის წერილის გადასაცემად მივიდა. დეკანოზის თქმით, წერილში ილია მეორე სააკაშვილს შიმშილობის შეწყვეტისკენ მოუწოდებს. მან, ასევე, თქვა, რომ პატრიარქსა და პრეზიდენტ სალომე ზურაბიშვილს შორის გუშინ გამართული შეხვედრის სასაუბრო თემა სააკაშვილის შეწყალება არ ყოფილა.

"მისი უწმინდესობის ლოცვა-კურთხევით მაქვს მისთვის გადასაცემი წერილი, რომლის შინაარსი შეეხება ისევ და ისევ მის პრინციპულ პოზიციას შიმშილობასთან დაკავშირებით და მოვიკითხო მისი უწმინდესობის სახელით. თხოვნა და რჩევა არის მისი უწმინდესობის რომ შეწყვიტოს [შიმშილობა]", — განაცხადა დეკანოზმა რუსთავის ციხესთან.

სააკაშვილი პირველ ოქტომბერს დააკავეს. ის ბრალს არ აღიარებს, ამიტომ საპატიმროში გადაყვანის შემდეგ შიმშილობა დაიწყო და უკვე 35 დღეა შიმშილობს. მისი პირადი ექიმი აცხადებს, რომ ექსპრეზიდენტს ექიმების მეთვალყურეობა სჭირდება და საჭიროა კლინიკაში გადაყვანა. პენიტენციური სამსახური სააკაშვილს მხოლოდ ციხის კლინიკაში გადაყვანას სთავაზობს, ის უარზეა.

პროტესტის ნიშნად სააკაშვილმა უარი თქვა ნებისმიერ სამედიცინო დახმარებასა და ტესტების გაკეთებაზე. თუმცა დღეს, 3 ნოემბერს მისმა ექიმმა განაცხადა, რომ ის თავს სუსტად გრძნობს და ანალიზების გაკეთებაზე დაითანხმეს.