დაავადებათა კონტროლის ეროვნული ცენტრის ხელმძღვანელის, ამირან გამყრელიძის განცხადებით, საქართველოს პრეზიდენტს, სალომე ზურაბიშვილს პანდემიის შესახებ ბრიფინგზე გამოთქმული მოსაზრებების გამო მადლობა გადაუხადა. მისი თქმით, "ზოგიერთი პოსტულატი" თავადაც ხშირად გაუჟღერებია.

"ქალბატონი პრეზიდენტის განცხადებების შეფასებას, ალბათ, არასწორია, რომ გავაკეთო. მე ქალბატონ პრეზიდენტს დიდი მადლობა გადავუხადე ოფიციალურად მისი განცხადებისთვის, რაც მან გუშინ გააკეთა პანდემიასთან და პანდემიის წინააღმდეგ ბრძოლის მხარდაჭერასთან დაკავშირებით. რა თქმა უნდა, ზოგიერთი პოსტულატი მეც ხშირად გამიჟღერებია, იცით, რომ ემ მომხრე ვარ ზოგიერთ ჯგუფებში სავალდებულოების, მათ შორის, ჩემს კოლეგებსა და მასწავლებლებში, მაგრამ სავალდებულოების პრინციპი არ არის მარტივად გადასაწყვეტი", — განაცხადა მან.

დღეს საკოორდინაციო საბჭოს საქართველოს პრეზიდენტიც, სალომე ზურაბიშვილიც დაესწრო. როგორც ჯანდაცვის მინისტრის მოადგილემ, თამარ გაბუნიამ ბრიფინგზე ისაუბრა, დღევანდელი სხდომის მთავარი თემა სწორედ მწვანე პასპორტების კონცეფცია იყო. კერძოდ, მისი თქმით, მსჯელობენ, როგორ იმოქმედებს ის სხვადასხვა პარამეტრზე, მათ შორის, ადამიანის უფლებებზე, ფინანსურ და ეკონომიკურ, ასევე, ბიზნეს აქტივობაზე.

მანამდე, 3 ნოემბერს ზურაბიშვილის საგანგებო ბრიფინგი გაიმართა. პრეზიდენტმა ისაუბრა პანდემიაზე, ვაქცინაციაზე და ამ საკითხისადმი ეკლესიის დამოკიდებულებაზე. მან პირდაპირ მიმართა საპატრიარქოს, რომ დაიწყონ ვაქცინაციაზე მოწოდება და პასუხისმგებლობა შეახსენა.

ამასთან, სალომე ზურაბიშვილმა ვაქცინაციასთან დაკავშირებით ხელისუფლებას მკაცრი ზომების გატარებისკენ მოუწოდა, რაც მოიცავს სავალდებულო აცრას რისკ-ჯგუფებისთვის, კოვიდპასპორტების შემოტანას საჯარო სივრცეებისთვის და "თუნდაც ფასიან მკურნალობას აუცრელი ადამიანებისთვის". ამასთან, მანვე თქვა, რომ ეკონომიკური აქტივობების შეზღუდვის წინააღმდეგია, ვინაიდან ეს, პირველ რიგში, დააზარალებს მოსახლეობის იმ ნაწილს, რომელიც ისედაც უმძიმესი სოციალური გამოწვევების წინაშეა.

გაიგეთ მეტი: