სულ ახლახან სახელმწიფო უსაფრთხოების სამსახურმა ფეისბუქზე განცხადება გაავრცელა, რომელშიც "დესტრუქციულ ძალებს დანაშაულებრივი ქმედებების ჩადენისგან" თავი შეკავებისკენ მოუწოდა. დანაშაულებრივ ქმედებად პოსტში "თანამოაზრეებისთვის განზრახ თუ გაუცნობიერებლად, რევოლუციისა და ხელისუფლების დამხობისკენ პირდაპირ მოწოდებაა" მოხსენიებული, რომელიც უწყების ცნობით, სოციალურ ქსელებში ბოლო პერიოდში ვრცელდება.

განცხადებას დიდი გამოხმაურება მოჰყვა, ძირითადად, ირონიული. გაფრთხილებიდან მალევე მოქალაქეებმა ფეისბუქზე "რევოლუციის" დაპოსტვა დაიწყეს. მანამდე კი, სანამ სუს გამოხატვის თავისუფლების აკრძალვის გამკაცრებაზე იფიქრებდეს, მოდით, ჩამოთვალოთ, კიდევ რისი დაპოსტვა უნდა აგვიკრძალოს მთავრობამ.

1. ფასებზე წუწუნი

ფოტო: Tenor

თქვენი არ ვიცი, მაგრამ მე კი ისე ხშირად მხვდება "ნიუსფიდში" გაზრდილ ფასებზე წუწუნი, რომ აუცილებლად ავკრძალავდი — ეს ხომ პირდაპირი თუ არა, ირიბი მოწოდებაა რევოლუციისკენ. არც ისაა გამორიცხული, პროდუქციის გაძვირების მოწინააღმდეგეები ქვეყნის დესტრუქციული ძალების მიერ იმართებოდნენ.

2. დიეტის ინსტრუქციები

ფოტო: Teno

ჯერ ერთი, რომ დიეტები ადამიანს ასუსტებს, დასუსტებული ადამიანები დასუსტებულ სახელმწიფოს ნიშნავს. მეორეც, დიეტის დაცვა ერთგვარი შიმშილობაა, რაც პროტესტის ფორმას წარმოადგენს. მოშიმშილე მოქალაქე კი ასევე დესტრუქციული ძალაა.

3. წალენჯიხაში "დაჩექინება"

ფოტო: Tenor

რამდენიმე დღის წინ, სამეგრელოს ამ პატარა ქალაქმა დაამტკიცა, რომ "მეცამეტე რაიონია". აქედან გამომდინარე, ეჭვგარეშეა, რომ ნებისმიერი ქმედება სოციალურ ქსელში, რომელიც წალენჯიხიზაციისკენაა მიმართული, უარყოფითად აისახება სახელმწიფოს უსაფრთხოებაზე.

4. პარიზში გადაღებული ისეთი ფოტოების გამოქვეყნება, სადაც ნაგავში მქექავი პარიზელი არ ჩანს

ფოტო: Giphy

მერე სუპერმარკეტების უზარმაზარ რიგებში მდგარმა ხალხმა რომ არ დაიწყოს წუწუნი სიღარიბეზე და პარიზთან პარალელების გავლება.

5. ნელთბილი ბიზნესების რეკლამები

ფოტო: Giph

ნელთბილში ზუსტად რა იგულისხმება, არ ვიცი, თუმცა, სოციალური ქსელები სინამდვილეს უნდა ასახავდეს, საქართველოში კი ეკონომიკა ადუღებამდეა მიყვანილი.

6. უფასო სასადილოებში გადაღებული საკვების გამომზეურება

ფოტო: Tenor

ხომ შეიძლება, ვინმეს შეშურდეს, თავის საჭმელს ხელი ჰკრას და თავადაც უფასო სასადილოში მირთმევა მოისურვოს?!

7. დედასთან გადაღებული ფოტოების გამოქვეყნება

ფოტო: Giphy

თუ სისუსტეზე ვსაუბრობთ, ისიც აღვნიშნოთ, რომ დედას ბუშტებით წინ ვერ წავალთ.

8. საღამოს საათებში სენტიმენტალური სიმღერების გაზიარება

ფოტო: Tenor

არაფერი არ აზიანებს სიძლიერეს ისე, როგორც სენტიმენტალურობა. ერთმნიშვნელოვნად ცხადია, რომ სახელმწიფო უსაფრთხოების სამსახურმა გულის აჩუყების შეზღუდვაზეც უნდა იზრუნოს.

9. კონკრეტულად Wind of Change-ის გაზიარებაც

ფოტო: Gifer

ცვლილებების და დესტრუქციის ქარიღა გვაკლია საათივით აწყობილ ქვეყანაში!

10. ფრაზები იმ წიგნებიდან, სადაც რევოლუციაზეა საუბარი

ფოტო: Giphy

პირველ რიგში, ჩარლ დიკენსის ორი ქალაქის ამბავის ნებისმიერი სახით ხსენება უნდა იკრძალებოდეს ქვეყანაში, რომელსაც მშვიდობა და სტაბილურობა სურს.

ბონუსი: არგუმენტად "სიტყვის თავისუფლების" მოშველიება

ფოტო: Gifer

სიტყვის თავისუფლება რომ კარგი ყოფილიყო, კომუნისტებს დაასწრებდით?!