თბილისის რესპუბლიკური საავადმყოფოს კლინიკური დირექტორი, დევი ტაბიძე ამბობს, რომ მრავალრიცხოვანი აქციები კორონავირუსის პროვოცირებისათვის ერთ-ერთი მნიშვნელოვანი ფაქტორია.

"მე პოლიტიკური განცხადებებისგან კიდევ ერთხელ ვიმეორებ, თავს შევიკავებ, იმიტომ, რომ არ ვარ პოლიტიკოსი, ვარ ექიმი, მაგრამ ხელი შეუწყო ყოველივე ამან. 10 ათასობით და 50 ათასობით ადამიანების შეკრება არის პროვოცირების ერთ-ერთი ძალიან მნიშვნელოვანი ნაწილი. ეს უნდა გადაწყვიტოს ხელისუფლებამ, ეს ჩვენი გადასაწყვეტი არ არის", — აცხადებს ის.

ამასთან, ტაბიძის თქმით, ვაქცინაციის მაჩვენებელი იმდენად დაბალია, რომ მას შესაძლებელია "ნულოვანი ზღვარი" ეწოდოს. გარდა ამისა, ტაბიძის თქმით, მოსახლეობისთვის აცრის იძულება სამართლებრივად არასწორია, თუმცა, გარკვეული იძულებები საჭიროა, რათა ადამიანთა ჯანმრთელობა იყოს დაცული.

"საკოორდინაციო საბჭოს ნამდვილად შეუძლია მიიღოს მკაცრი გადაწყვეტილება, მაგრამ აქ არის იურიდიული ნაწილი, ჩვენ რომ ვაიძულოთ მოსახლეობა, ეს არაფრით არ შეიძლება. ეს იურიდიული მიმართულებით წინააღმდეგობაში მოდის ადამიანის უფლებების დაცვასთან. მეორე ნაწილია, რომელსაც ჰქვია ჯანმრთელობა და სიცოცხლე და მოდი, აი, ეს უზენაესი რაც არის, დავიცვათ, გავატაროთ ისეთი ღონისძიებები, თუნდაც, რაღაცა იძულებები, რომლებიც საშუალებას მოგვცემს და ადამიანებს გადავარჩენთ. უნდა შედგეს რეალური სია და ჩამონათვალი იმ სპეციალობების, იმ სამსახურების და იმ ადამიანებისა, რომლებსაც უფრო მეტად, ხშირად უწევს სოციალური ურთიერთობები დიდ რაოდენობა ხალხთან, პირველ რიგში, ექიმები ვალდებულები არიან, რომ იყვნენ აცრილები", — ამბობს ის.

3 ნოემბრის მონაცემებით, საქართველოში კორონავირუსის 6 024 ახალი შემთხვევა დადასტურდა, გამოჯანმრთელდა — 3 818, ხოლო გარდაიცვალა 49 ადამიანი.

NCDC-ის მონაცემებით, სულ ჩატარებულია 1 986 729 აცრა. ამასთან, სულ მცირე 1 დოზით ვაქცინირებულია მოზრდილი მოსახლეობის 36,6%, სრულად კი აცრილია — 33,1%. დღიურად აიცრა 3 868 ადამიანი.

საქართველოში ამ დროისთვის 3 სხვადასხვა ვაქცინაა ხელმისაწვდომი.

ვაქცინაციის პროგრამაში ჩართვა შეუძლია ყველა მსურველს, 16 წლის ზემოთ. გარდა ამისა, ქრონიკული დაავადებების ან საზღვარგარეთ წასვლის აუცილებლობის შემთხვევაში, აცრას შეძლებენ 12-წლიდან ბავშვებიც.

უკვე შესაძლებელია ბუსტერითა და ჩანაცვლებით სარგებლობაც. დეტალები ნახეთ აქ: ვინ მიიღებს, როდის და როგორ — რა უნდა ვიცოდეთ ბუსტერსა და ჩანაცვლებაზე

ვაქცინაციისთვის დარეგისტრირება შეგიძლიათ ვებგვერდზე Booking.moh.gov.ge.

იხილეთ იმ დაწესებულებების ჩამონათვალი, სადაც შესაძლებელია ვაქცინაცია. სია პერიოდულად ახლდება და ადგილები ემატება.

ასევე, შეგიძლიათ ნახოთ იმ დაწესებულებების სია, სადაც აცრას წინასწარი რეგისტრაცის გარეშე შეძლებთ. გარდა ამისა, თბილისში მოქმედებს ვაქცინაციის მოძრავი პუნქტები.