კაცს, რომელმაც ცოლი აწამა, 9 წლით თავისუფლების აღკვეთა მიუსაჯეს. ინფორმაციას ამის შესახებ პროკურატურა ავრცელებს. უწყების თქმით, კაცმა ცოლს უთხრა, რომ არ ჰქონდა მამრობითი სქესის მეგობრის ყოლის, მასთან მიმოწერის, ასევე, ფულის დამოუკიდებლად განკარგვის უფლება და აწამა.

"ბრალდებულმა, საკუთარ სახლში, იმ მიზეზით, რომ თითქოს მის მეუღლეს არ ჰქონდა მამრობითი სქესის მეგობრების ყოლის, მათთან მიმოწერის და საკუთარი ფულადი სახსრების დამოუკიდებლად განკარგვის უფლება, გენდერის ნიშნით შეუწყნარებლობის მოტივით, მის მიმართ განახორციელა წამება. ბრალდებული ღალატის ფაქტის აღიარების მიზნით, მეუღლეზე 4-5 საათის განმავლობაში ფიზიკურად ძალადობდა, სცემდა მას და აწამებდა. წამების შემდეგ, ბრალდებულმა დაზარალებული წაიყვანა მშობლების სახლში, სადაც ფიზიკურად გაუსწორდა მეუღლის ძმას, მამას და იარაღის დემონსტრირებით და გასროლით, დაზარალებულის ოჯახის წევრებს სიცოცხლის მოსპობით დაემუქრა", — აცხადებენ პროკურატურაში.

უწყებაში აცხადებენ, რომ თბილისის საქალაქო სასამართლომ სრულად გაიზიარა ბრალდების მხარის მიერ წარდგენილი მტკიცებულებები და გენდერის ნიშნით, შეუწყნარებლობის მოტივით, ძალადობის, წამების და მუქარის ფაქტზე ბრალდებული დამნაშავედ ცნო.

უწყების ინფორმაციით, კაცმა ცოლი 2021 წლის 24 თებერვალს აწამა და ის 25 თებერვალს დააკავეს. მას ბრალი წარედგინა წამების, ძალადობის, მუქარის და ოჯახში ძალადობის მუხლით წარედგინა და აღკვეთის ღონისძიების სახით პატიმრობა შეეფარდა.