ბათუმში ოპოზიციის აქცია მიმდინარეობს. იქ შეკრებილები არიან ოპოზიციური პარტიების ლიდერები, მათ შორის, ნიკა მელია, მამუკა ხაზარაძე, ბადრი ჯაფარიძე და ელენე ხოშტარია. როგორც ნაციონალური მოძრაობის ლიდერმა, ნიკა მელიამ სიტყვით გამოსვლისას განაცხადა, ბრძოლა არ დასრულებულა და ახლა იწყება.

"არცერთ შემთხვევაში არ იქნება უკან დახევა. არა იმიტომ, რომ ჩვენ ასე გვსურს, არამედ ჩვენ ვართ ვალდებულები. ჩვენ, დიახაც, მოგვპარეს არჩევანი, ძალადობითა და სხვადასხვა უღირსი მეთოდით", — აღნიშნა მელიამ.

მისივე თქმით, საპროტესტო აქციებისკენ აპირებენ სვლას და ისინი არ შენელდება მანამ, სანამ "სიმართლე არ გაიმარჯვებს".

პარალელურად, დღეს აქცია გაიმართება რუსთავის ციხესთან, სადაც ექსპრეზიდენტი, მიხეილ სააკაშვილი 32-ე დღეა შიმშილობს.

30 ოქტომბერს საქართველოში ადგილობრივი თვითმმართველობის არჩევნები ჩატარდა. ცესკომ წინასწარი შედეგები გამოაქვეყნა, რის მიხედვითაც წალენჯიხა ერთადერთი მუნიციპალიტეტია, სადაც ოპოზიციის კანდიდატი იგებს. სხვა დიდ ქალაქებსა და თვითმმართველ თემებში მმართველი გუნდის კანდიდატები იგებენ ან ლიდერობენ.

შედეგებთან დაკავშირებით განცხადება იმავე ღამეს გააკეთა ოპოზციის თბილისის მერობის კანდიდატმა თბილისში, ნიკა მელიამ და არჩევნებს "გაუქმებული" უწოდა. მისი თქმით, ბევრ მუნიციპალიტეტში ოპოზიციის მოპოვებული გამარჯვება ქართული ოცნების დამფუძნებელმა, ბიძინა ივანიშვილმა მოიპარა და "ვითომც არ იყო მოპოვებული ისე წაიღო, საკუთარ სხვადასხვა რეზიდენციებში".

ამის შემდეგ, ოპოზიციამ აქციები დააანონსა მთელი საქართველოს მასშტაბით. დღეს, 2 ნოემბერს ოპოზიციის მხარდამჭერები ბათუმსა და რუსთავში იკრიბებიან. ხვალ კი აქცია იქნება ზუგდიდშიც. რაც შეეხება დედაქალაქს, თბილისში აქცია 6 ნოემბერს ჩატარდება.