ნიკოლა სტერჯენის ინიციატივას დამოუკიდებლობაზე მეორე რეფერენდუმის ჩატარების შესახებ შოტლანდიის პარლამენტმა ფორმალურად დაუჭირა მხარი. BBC-ის ცნობით, ინიციატივის მომხრე 69 დეპუტატია, 59 კი - წინააღმდეგი.

შოტლანდიის პირველი მინისტრის, ნიკოლა სტერჯენის თქმით, რეფერენდუმი საჭიროა, რათა ქვეყანას მიეცეს უფლება აირჩიოს, რომელი გზით სურს წასვლა.

ბრიტანეთის ხელისუფლებამ უკვე განაცხადა, რომ ბრექსიტის პროცესის დასრულებამდე რეფერენდუმზე ნებართვას არ გასცემს. პრემიერ-მინისტრი ტერეზა მეი გამუდმებით იმეორებს, რომ "ახლა რეფერენდუმის დრო არ არის."

სტერჯენის თქმით, ის არ ცდილობს ბრიტანეთის ხელისუფლებისთვის წინააღმდეგობის გაწევას, არამედ უბრალოდ "გონივრული დისკუსია" სურს:

"შოტლანდიის მოქალაქეებს უნდა ჰქონდეთ უფლება აირჩიონ ბრექსიტს - სავარაუდოდ ძალიან რთულ ბრექსიტს - და დამოუკიდებელ შოტლანდიას შორის, რომელსაც შესაძლებლობა ექნება აირჩიოს საკუთარი კურსი.

იმედი მაქვს გაერთიანებული სამეფოს ხელისუფლება პატივს სცემს პარლამენტის სურვილს. ამ შემთხვევაში დისკუსიაში კარგის რწმენით და კომპრომისზე წასვლის მზაობით შევალ.

წინააღმდეგ შემთხვევაში, სააღდგომო დასვენების შემდეგ დავბრუნდები პარლამენტში და დავგეგმავთ ნაბიჯებს, რომელსაც შოტლანდიის პარლამენტი გადადგამს." - განაცხადა სტერჯენმა.

ორ-დღიანი დებატები შოტლანდიის პარლამენტში გასულ კვირას დაიწყო, თუმცა უესტმინსტერის ხიდზე ტერორისტული თავდასხმის გამო შეჩერდა.

შოტლანდიის მოქალაქეების 55-მა პროცენტმა 2014 წლის რეფერენდუმში დამოუკიდებლობის წინააღმდეგ მისცა ხმა. სტერჯენს კი სჯერა, რომ ბრექსიტით გამოწვეული ცვლილებების გამო მოქალაქეებს კიდევ უნდა დაესვათ ეს კითხვა.