წალენჯიხაში შემთხვევითობის პრინციპით შერჩეული 7 უბნის გადათვლა დაიწყო. გადათვლამ, შესაძლოა, არსებულ მონაცემებში ცვლილებები გამოიწვიოს. ცესკოს წინასწარი შედეგებით, ის ერთადერთი მუნიციპალიტეტია, სადაც ოპოზიცია იგებს.

ნაციონალური მოძრაობის წალენჯიხის მერობის კანდიდატი გიორგი ხარჩილავა, რომელიც ამ ეტაპზე არჩევნების მეორე ტურს იგებს, ეჭვობს, რომ შესაძლოა, ბიულეტენები გამიზნულად შეასწორონ და ჩაანაცვლონ.

"ამ 7-დან ორი არავითარ არითმეტიკულ ლოგიკაში და არც ალბათობის თეორიაში არ ჯდება. გვერდიგვერდ მდებარე უბნები დაემთხვა იმ უბანს, სადაც ჩვენ გავიმარჯვეთ ხმათა მცირე რაოდენობით. გვაქვს გამოცდილება ზუგდიდისა და წალენჯიხის მაგალითზე ჩანაცვლებული, შესწორებული ბიულეტენების. გვაქვს ძალიან მყარი, ლოგიკური ეჭვი, რომ საკრებულოშიც ამას აპირებენ, რათა საკრებულოში დაგვაკარგინონ სამართლიანად მოპოვებული უპირატესობა", — ამბობს ხარჩილავა.

წალენჯიხა ერთადერთი ქალაქია, სადაც ადგილობრივ თვითმმართველობის არჩევნებში ოპოზიციის მერობის კანდიდატმა 51,11% აიღო, ხოლო ქართული ოცნების კანდიდატმა — 48,89%.

ცენტრალური საარჩევნო კომისიის თავმჯდომარის, გიორგი კალანდარიშვილის განცხადებით, დღეს, პირველ ნოემბერს, 140 საარჩევნო უბნის შედეგები გადაითვლება.