30 ოქტომბერს საქართველოში თვითმმართველობის არჩევნების მეორე ტური გაიმართა, თუმცა ვერავინ იფიქრებდა, რომ ამ პროცესების მთავარი გმირი წალენჯიხა გახდებოდა: ცესკოს წინასწარი მონაცემებით, ადგილობრივ საარჩევნო უბნებზე დათვლილია ხმების 100% და ამ ეტაპზე წალენჯიხა ერთადერთი მუნიციპალიტეტია, სადაც ოპოზიციის კანდიდატი იგებს.

მაშინ, როცა სხვა დიდ ქალაქებსა და თვითმმართველ თემებში მმართველი გუნდის კანდიდატები ლიდერობენ, წალენჯიხა ბევრისთვის იმედის სიმბოლურ ნაპერწკლად ან კიდევ დემოკრატიის კუნძულად იქცა. ალბათ, ახლა სწორედ შესაფერისი დროა, რომ ეს მუნიციპალიტეტი უკეთ გავიცნოთ.

დასავლეთ საქართველოში, უფრო კონკრეტულად კი სამეგრელო-ზემო სვანეთის მხარეში მდებარე წალენჯიხა, გარდა უკვე ხსენებული უნიკალური პოლიტიკური აქტივობისა, საინტერესო ისტორიული წარსულითა და თვალწარმტაცი გეოგრაფიული თავისებურებებითაც გამოირჩევა, რაც ბევრი ჩვენგანისთვის, ალბათ, აქამდე ცნობილიც კი არ იყო.

პოლიტიკური თავშესაფრის წალენჯიხაში მოთხოვნის ხუმრობები იქით იყოს და ქვემოთ მოცემული ინფორმაციის გაცნობის შემდეგ, დიდი ალბათობით, ამ კუთხეში სტუმრობას უახლოესი შესაძლებლობისთანავე დააპირებთ.

1. ქუაქანცალია

ქუაქანცალია, იგივე მოქანავე ლოდი, არა მხოლოდ წალენჯიხის, არამედ მთელი სამეგრელოს ღირსშესანიშნაობაა. ლეგენდის თანახმად, ეს უზარმაზარი ქვა ღმერთების შთამომავალმა არამხუტუმ დადო მას შემდეგ, რაც მისი მეშვეობით დევს თავი გაუპო. ამ ლეგენდისა და იმ ფაქტის გამო, რომ ეს 1,75 მეტრი სიმაღლისა და 10 ტონა სიმძიმის კირქვის ლოდი ხელის შეხებისთანავე ქანაობას იწყებს, თუმცა თან ადგილიდან არ იძვრის, მნახველებში მისტიკურ განწყობას აღძრავს.

ქუაქანცალია ზღვის დონიდან 1800 მ სიმაღლეზე იმ წერტილში მდებარეობს, საიდანაც ამავდროულად ულამაზესი ხედი იშლება. შესაბამისად, ადგილზე ნანახით აღფრთოვანებასთან ერთად შთამბეჭდავი ფოტოების გადაღებასაც შეძლებთ.

2. ტობავარჩხილის ტბები

ტობავარჩხილის ტბები მრავალი მოლაშქრისთვის უკვე დიდი ხანია, საყვარელი დანიშნულების ადგილია, თუმცა იქ იმდენად საოცარი ბუნებრივი გარემოა შექმნილი, რომ მათაც კი მოანდომებს ლაშქრობის გზას გაუდგეს, ვინც აქამდე ამას ვერ ბედავდა.

ეგრისის ქედზე, ზღვის დონიდან 2650 მეტრზე მდებარე ტობავარჩხილის ტბაზე, იგივე ვერცხლის ტბაზე, მოხვედრა არც ისე მარტივია და საკმაოდ რთული მარშრუტის გავლა მოუწევს ნებისმიერ მსურველს, თუმცა საბოლოო შედეგი ამად ღირს. თანაც იქვე შეგიძლიათ, სხვა ისეთი ახლოს მდებარე ტბებიც ნახოთ, როგორებიცაა დიდღალიშ ტობა, კალალიშ ტობა და წაქაწყარიშ ტობა.

3. ჩანჩქერი ინწირა

წალენჯიხის რაიონში 2 ქალაქი და 37 სოფელია, რომლებიც ბუნებრივი მრავალფეროვნებით გაგაოცებთ. მაგალითად, სოფელ ჩქვალერში გადააწყდებით ჩანჩქერ ინწირას, რომელსაც ხშირად ასევე მოიხსენიებენ როგორც ინწრა. მის სანახავადაც გარკვეული ციცაბო მონაკვეთის ფეხით გავლა მოგიწევთ, მაგრამ ბოლოს მდინარე ინწირას კანიონში ამ ჩანჩქერს რომ გაუსწორებთ თვალს, დაღლა სულ გადაგავიწყდებათ.

4. მაცხოვრის ფერისცვალების საკათედრო ტაძარი

წალენჯიხის მუნიციპალიტეტის ადმინისტრაციული ცენტრის, ქალაქ წალენჯიხის სიახლოვეს მდებარეობს X-XIII საუკუნეების ტაძარი, რომელიც მნახველს განსაკუთრებით თავისი მოხატულობითა და ფრესკებით აოცებს. ეს უძველესი კომპლექსი მოიცავს ეკლესიას, სამრეკლოსა და 45 მეტრის სიგრძის გვირაბს. აღსანიშნავია, რომ იქვეა დაკრძალული სამეგრელოს მთავარი ლევან II დადიანი და მისი მეუღლე დედოფალი ნესტან დარეჯანი.

5. ტერენტი გრანელის სახლ-მუზეუმი

"ახლა უფრო ხშირია შეცდომების დაშვება,
ახლა მოდის ივნისი, ირგვლივ მწვანე მოლია.
ჩემი წმინდა სახელი პოეზიას დარჩება,
ჩემი გული და სისხლი — ეს Memento mori-ა."

ამ სტრიქონების ავტორი სწორედ ქალაქ წალენჯიხაში დაიბადა 1897 წელს. დღეს კი თუ პოეტის მშობლიურ ქალაქს ეწვევით, შესაძლებლობა მოგეცემათ, რომ ტერენტი გრანელის ორნამენტითა და ჩუქურთმიანი აივნებით დამშვენებული ორსართულიან სახლ-მუზეუმშიც შეიაროთ და მისი ცხოვრება და შემოქმედებაც უკეთ გაიცნოთ.