როგორც კინოს სახლის ფეისბუქ გვერდზე წერია, კინოს სახლის მცირე კინოდარბაზის რეკონსტრუქცია დასრულდა.

დარბაზი აღიჭურვა ახალი, თანამედროვე აპარატურით, რაც გულისხმობს კინოსაპროექციოს, ეკრანს, 5.1 DOLBY surround აუდიო სისტემასა და საკონფერენციო აუდიო სისტემას.

დარბაზში განახლდა სკამები, იატაკი, კედლები, სცენა, დამონტაჟდა სპეციალური აკუსტიკური მასალა, ახალი განათება და შეიცვალა გათბობისა და კონდენცირების სისტემა.

ფოტო: კინოს სახლის კინოდარბაზი/Cinema House


საქართველოს კინოაკადემიის მიზანია, რომ განახლებულმა კინოდარბაზმა გააგრძელოს ფუნქციონირება, როგორც ალტერნატიულმა სივრცემ კინომოყვარულთათვის, აგრეთვე თანამშრომლობის ფარგლებში შესთავაზოს სხვადასხვა ორგანიზაციებსა თუ ინსტიტუციებს მყარი კულტურული პლატფორმა, რომელიც დააკმაყოფილებს მათ მოთხოვნებსა და მოლოდინს. აქედან გამომდინარე, კინოდარბაზს, გარდა კინოჩვენებებისა, ექნება საშუალება უახლოეს მომავალში უმასპინძლოს სხვადასხვა ტიპის ღონისძიებებს:

  • პრეზენტაციებს
  • მასტერკლასებს
  • ვორქშოფებს
  • კონფერენციებს
  • ფესტივალებს
  • თემატურ საღამოებს
  • სოციალურ და საგანმანათლებლო აქტივობებს

გასულ თვეში, On.ge კინოს სახლის დირექტორს, ნინო ანჯაფარიძეს დაუკავშირდა. რომელმაც გვითხრა, რომ შენობაში სარემონტო სამუშაოები გაზაფხულისთვის დასრულდებოდა და კინორეპერტუარიც ამის შემდეგ განახლდებოდა.

"ჩვენ გვინდა მაყურებლებს განსხვავებული პროგრამა შევთავაზოთ - ფილმები, რომლებიც ოფიციალურად იქნება შეძენილი და ჩამოტანილი ჩვენთან. ეს გარკვეულ სირთულეებთანაც არის დაკავშირებული. ამჟამად ვცდილობთ მოლაპარაკებებს ევროპულ კინოთეატრებთანაც. თებერვლისთვის შესაძლოა მზად ვიყოთ ქართული ფილმების ჩვენებებისთვის, პრემიერებისთვის და ა.შ, თუმცა სრული დატვირთვით და ახალი პროგრამით კინოს სახლი გაზაფხულიდან ამუშავდება", - ამბობდა ნინო ანჯაფარიძე.

თითქმის ორი წელი გავიდა მას შემდეგ, რაც ქართველი კინომანების თავშეყრის ადგილი კინოს სახლი სარემონტო სამუშაოების გამო დახურულია.