თითქმის ორი წელი გავიდა მას შემდეგ, რაც ქართველი კინომანების თავშეყრის ადგილი კინოს სახლი სარემონტო სამუშაოების გამო დახურულია.

როგორც კინოდარბაზის ფეისბუქ გვერდზე წერია, ამჟამად შენობის რეკონსტრუქცია მიმდინარეობს.

On.ge კინოს სახლის დირექტორს, ნინო ანჯაფარიძეს დაუკავშირდა. როგორც ანჯაფარიძე ამბობს, გაზაფხულისთვის შენობაში რემონტი დასრულდება და კინორეპერტუარიც განახლდება.

"ჩვენ გვინდა მაყურებლებს განსხვავებული პროგრამა შევთავაზოთ - ფილმები, რომლებიც ოფიციალურად იქნება შეძენილი და ჩამოტანილი ჩვენთან. ეს გარკვეულ სირთულეებთანაც არის დაკავშირებული. ამჟამად ვცდილობთ მოლაპარაკებებს ევროპულ კინოთეატრებთანაც. თებერვლისთვის შესაძლოა მზად ვიყოთ ქართული ფილმების ჩვენებებისთვის, პრემიერებისთვის და ა.შ, თუმცა სრული დატვირთვით და ახალი პროგრამით კინოს სახლი გაზაფხულიდან ამუშავდება", - ამბობს ნინო ანჯაფარიძე.