დღეს ნიკა მელიამ აქცია დააანონსა, რომელიც, მისი თქმით, კვირას გაიმართება. თუმცა ნაციონალური მოძრაობის თავმჯდომარეს თარიღი არ დაუკონკრეტებია. On.ge დაუკავშირდა პარტიის პრესსამსახურს, სადაც დაგვიდასტურეს, რომ აქცია იგეგმება ზუსტად ერთ კვირაში, 7 ნოემბერს.

დღევანდელი აქცია ოპოზიციამ ცესკოს მიერ არჩევნების მეორე ტურის შედეგების გამოქვეყნების შემდეგ დააანონსა. თბილისის მერობის კანდიდატმა პარლამენტთან შეკრებილებს სამოქმედო გეგმა გააცნო. მისი თქმით, უკან დახევას არ აპირებენ — სამშაბათს ბათუმში ჩავლენ, რათა ადგილზე გააპროტესტონ, შემდეგ ქუთაისში და სხვა ქალაქებში, კვირას კი აქცია თბილისში გაიმართება.

ენმ-ის თავმჯდომარის განცხადებით, ეს იქნება განსხვავებული აქცია, რომელსაც მთელი მსოფლიო დაინახავს.

"მაგრამ ძალიან მნიშვნელოვანია, სწორად გამიგოთ ახლა — ჩვენ გვჭირდება სერიოზული ორგანიზაციული საკითხების მოგვარება, გვჭირდება სულ, სულ მცირე დრო იმისათვის, რომ პროტესტი, მასშტაბური აქცია, დემონსტრაცია, რომელიც მთელი მსოფლიო დაინახავს და გაიმართება თავისუფლების მოედანზე, რუსთაველის გამზირზე, კვირა დღეს, იყოს მასშტაბური, როგორც არასოდეს, მაგრამ ეს აქცია იქნება განსხვავებული ყველა წინა დემონსტრაციებისა და შეკრებებისგან, ბევრი თვალსაზრისით. ნება მომეცით, ამაზე მეტ დეტალებში ახლა არ შევიდე", — თქვა მელიამ.

ამასთან, ნიკა მელიამ ქართულ ოცნებას მიმართა, რომ ეს ბრძოლა, რომელიც გაიშლება მთელი ქვეყნის მასშტაბით და მიეძღვნება სამართლიანობას და მოპარული ხმების უკან დაბრუნებას, ცვლილებებს, აუცილებლად გულისხმობს "იმ დაკავებული ადამიანების გათავისუფლებას, რომლებიც თქვენ დაიჭირეთ მხოლოდ და მხოლოდ იმიტომ, რომ იყვნენ ოპოზიციის მხარდამჭერები და ჩაუდეთ იარაღები და ხელყუმბარები ქვეყნის სხვადასხვა რეგიონში".

მისივე თქმით, ამ ყველაფრის პარალელურად, "გასაჩივრების პროცედურებშიც შედიან", რადგან დიდ პატივს სცემენ სტრატეგიულ პარტნიორებს და სურთ კიდევ ერთხელ დარწმუნონ არსებულ რეალობაში.