თბილისის მერობის კანდიდატის, ნიკა მელიას განცხადებით, საქართველოში არჩევნები გაუქმებულია და უკომპრომისო ბრძოლას აპირებენ. მისივე თქმით, საზოგადოების წინაშე სამოქმედო გეგმას ხვალ წარადგენენ.

მელია ამბობს, რომ ბევრ მუნიციპალიტეტში ოპოზიციის მოპოვებული გამარჯვება ბიძინა ივანიშვილმა მოიპარა და "ვითომც არ იყო მოპოვებული ისე წაიღო, საკუთარ სხვადასხვა რეზიდენციებში".

"ბიძინა ივანიშვილზე იყო დამოკიდებული და ივანიშვილმა გადადგა ის ნაბიჯი, რომელიც გადადგა. პასუხი იქნება ადეკვატური. მკითხავდით ახლა ალბათ, რა გაქვთ გეგმა. გპასუხობთ — არჩევნები არის გაუქმებული. არასოდეს მსგავსი განცხადება მე არ გამიკეთებია, არასოდეს. უკანასკნელი რამდენიმე საათი განგებ არ ვდგებოდი მედიის წინაშე, მინდოდა დავრწმუნებულიყავი, რომ ეს არჩევნები ნამდვილად არის გაუქმებული, ქუთაისიდან დაწყებული, ზუგდიდი, თბილისი, ასე შემდეგ. უბრალოდ, ვითომც არაფერი ამ ადამიანმა ააორთქლა არჩევნები. ამიტომ ხვალ ჩვენ ძალიან კონკრეტული გეგმით წარვსდგებით თქვენს წინაშე და ბრძოლა იქნება უკომპრომისო", — განაცხადა მან ბრიფინგზე.

მელიას თქმით, ამ საქმეში პარტიული პოლიტიკა და ვიწრო პარტიული ინტერესები აღარ არსებობს. მისივე თქმით, კოალიციურმა ერთობამ იმუშავა და ახლა მათი ამოცანაა, ეს კოალიცია უფრო ფართო გახდეს.

"მაგრამ ამ კოალიციაში ყველას ადგილი უნდა იყოს, არამხოლოდ პოლიტიკოსების, საზოგადოებრივად აქტიური მოქალაქეების, ჟურნალისტების, ექიმების, ყველა, ყველა, ყველა, ვინც არის შეწუხებული, გულახდილად, რომ სახელმწიფოში არჩევნები ივანიშვილის პირობებში აღარასდროს ჩატარდება", — განაცხადა მან.

როგორც მელიამ აღნიშნა, სიტყვებს "ჰარი-ჰარალოზე" არ ისვრიან და ივანიშვილმა მისთვის მიცემული შანსი არ გამოიყენა. მან მოუწოდა თანამებრძოლებს და მოქალაქეებს მოემზადონ "ძალიან საინტერესო თუმცა მძიმე თავგადასავლისთვის".

"ჩვენ მთელი ამ საათების განმავლობაში გვქონდა კომუნიკაცია სტრატეგიულ პარტნიორებთან და მე მათ არ დავუმალე ის, რასაც ახლა თქვენ გესაუბრებით. მე მათ ვუთხარი, რომ არჩევნები ამ ქვეყანაში არის გაუქმებული. მანამდეც მქონდა ამ ყველაფერთან დაკავშირებით მათთან საუბარი და მერწმუნეთ, არ არსებობს ადამიანი, ქართველი თუ უცხოელი, სტრატეგიული პარტნიორი თუ თანამებრძოლი, ვინც არ იზიარებს ამ მოსაზრებას. ამიტომ აქ აღარ არის მხოლოდ პოლიტიკოსების საბრძოლველი. დიახ ჩვენ ვიქნებით ავანგარდში, მაგრამ ჩვენი სურვილი არის, რომ ეს ბრძოლა წარიმართოს ძალიან ფართო კოალიციური მოძრაობით, ამიტომ მოემზადეთ ძვირფასო თანამოქალაქეებო, თანამემამულეებო, ევროპული დემოკრატიის ღირებულებებისა და ფასეულობების მოსურნე საქართველოს მოქალაქეებო, ძალიან საინტერესო თუმცა მძიმე თავგადასავლისთვის, ბრძოლა იქნება უკომპრომისო, ბრძოლა იქნება ბოლომდე გამარჯვებისთვის და ბრძოლა იქნება მანამ, სანამ ამ ქვეყანაში ჩვენ არ მოიპოვებთ არჩევნების ჩატარების შესაძლებლობას", — განაცხადა მან.

მელია ბრიფინგიდან ისე წავიდა, რომ მედიის კითხვებისთვის არ უპასუხია.

ამ ეტაპზე ცესკოს წინასწარი მონაცემებით, თბილისში დათვლილია ხმების 96,229% და ქართული ოცნების კანდიდატი, კახა კალაძე ლიდერობს. მას ხმების 55,555% აქვს, მელიას კი 44,445%. გარდა ამისა, წინასწარი მონაცემებით, ოპოზიცია ერთადერთ მუნიციპალიტეტში, წალენჯიხაში ლიდერობს.

აღსანიშნია, რომ მთავარი არხის ეგზიტპოლით, ოპოზიცია მეორე ტურში ყველა დიდ ქალაქსა და ზუგდიდში იგებდა. რაც შეეხება ტელეკომპანია იმედის დაკვეთით ჩატარებულ ეგზიტპოლის შედეგების, ამ კვლევის მიხედვით 4 დიდ ქალაქში მმართველი გუნდის კანდიდატები იგებდნენ.

ნახეთ არჩევნების მეორე ტურის შედეგები დეტალურად On.ge-ზე: