ნაციონალური მოძრაობის ქუთაისის მერობის კანდიდატის, ხატია დეკანოიძის განცხადებით, ქუთაისის ერთ-ერთ უბანზე იმაზე მეტი ბიულეტენია, ვიდრე ხელმოწერა. ის აღნიშნული უბნის შედეგების გაუქმენას ითხოვს.

"93-ე უბანზე ბიულეტენი მეტია, ვიდრე ხელმოწერა, შედეგები უნდა გაუქმდეს", — წერს დეკანოიძე Facebook გვერდზე.

ხმის მიცემის დასრულების შემდეგ ეგზიტპოლები ორმა სხვადასხვა ტელევიზიამ გამოაქვეყნა, რომელთა მონაცემებიც ერთმანეთისგან რადიკალურად განსხვავებულია.

გორბის მიერ ჩატარებული იმედის ეგზიტპოლის შედეგები ასეთია:

  • ხატია დეკანოიძე — 48,1%
  • იოსებ ხახალეიშვილი — 51,9%

რადიკალურად განსხვავებული შედეგებია მთავარი არხის მიერ ჩატარებული ეგზიტპოლით, რომლის მიხედვითაც ხატია დეკანოიძე ლიდერობს, ეგზიტპოლის შედეგები შემდეგნაირად განაწილდა:

  • ხატია დეკანოიძე — 53%;
  • იოსებ ხახალეიშვილი — 47%.

რაც შეეხება ცესკოს მონაცემებს, ამ ეტაპზე 124 უბნიდან სულ დათვლილია ხმების 16,129%. ცესკოს შედეგები ასე გადანაწილდა:

  • ხატია დეკანოიძე — 46,245%;
  • იოსებ ხახალეიშვილი — 53,755%.

აღსანიშნია, რომ მეორე ტური 15 თვითმმართველ თემსა და 5 თვითმმართველ ქალაქში, მათ შორის, თბილისში გაიმართა. ასევე, 24 საარჩევნო ოლქში, რომლის შედეგად აირჩევა 42 მაჟორიტარი. მერობისა და მაჟორიტარობისთვის ჯამში 9 პარტიის, ასევე, ორი დამოუკიდებელი კანდიდატი იბრძვის.

დღის განმავლობაში გავრცელდა არაერთი ინფორმაცია დარღვევების, მათ შორის, ამომრჩეველზე ზეწოლისა და სავარაუდო მოსყიდვის შესახებ. ასევე, მოხდა დაპირისპირებები საარჩევნო უბნებთან. კოორდინატორები და აგიტატორები თავს დაესხნენ და ფიზიკური შეურაცხყოფა მიაყენეს ჟურნალისტებსაც.

გაიგეთ, როგორი იყო ამომრჩეველთა აქტივობა დღის განმავლობაში:

არჩევნების მიმდინარეობაზე დეტალური ინფორმაციის გასაგებად, თვალი ადევნეთ ჩვენს გვერდს, სადაც ინფორმაცია პირდაპირ ეთერში ახლდება.