საპარლამენტო უმრავლესობის ლიდერმა, ზვიად კვაჭანტირაძე უარყოფს, რომ მან ადგილობრივი თვითმმართველობის შუალედური არჩევნების ოზურგეთის სოფელ ნასაკირალში წაგების მიზეზად ოცნების მიერ ქალი კანდიდატის წარდგენა დაასახელა.

22 მაისს, როცა არჩევნების წინასწარი შედეგები გამოცხადდა, ცნობილი გახდა, რომ ნასაკირალში ქართული ოცნების კანდიდატ ნონა ტუნაძეს მოუგო ერთიანი ნაციონალური მოძრაობის კანდიდატმა ბესიკ ქათამაძემ.

ზვიად კვაჭანტირაძემ შედეგების გამოცხადებისთანავე, ფეისბუკის საკუთარ გვერდზე მომხმარებლების პრეტენზიებს საჯარო პოსტის კომენტარებში უპასუხა არჩევნების წაგებასთან დაკავშირებით და ქართული ოცნების შეცდომაც დაასახელა: "გეთანხმები, რომ სწორ კანდიდატებს აქვს გადამწყვეტი მნიშვნელობა. ერთ-ერთი მთავარი შეცდომა ნასაკირალში იყო ის, რომ მუსლიმურ თემში ახალგაზრდა ბიჭს დავუპირისპირეთ ქალი, თუნდაც ძალიან კარგი ქალბატონი".

On.ge ზვიად კვაჭანტირაძისგან რამდენიმე დღის წინ ცდილობდა მის მიერ დაწერილ სექსისტურ კომენტარზე განმარტების მოპოვებას, თუმცა, მასთან ინტერვიუს ჩაწერა მხოლოდ დღეს, 26 მაისს შევძელით.

ზვიად კვაჭანტირაძემ უარყო, რომ მან მსგავსი რამ დაწერა: "მე ასეთი რამ არ დამიწერია. ასეთი მსჯელობა მიდის და საზოგადოების გარკვეულ ნაწილს, მათ შორის ჩვენს ამომრჩეველს მიაჩნია, რომ კანდიდატი იყო არასწორად შერჩეული, მაგრამ ეს არ შეესაბამება სინამდვილეს, თუ არ გავითვალისწინებთ იმას, რომ რადგანაც მან წააგო, შესაძლებელია ასეც ვივარაუდოთ".

საპარლამენტო უმრავლესობის ლიდერის თქმით, ნასაკირალში მუსლიმი თემი ცხოვრობს და აქ ქალი კანდიდატურა არჩევნებზე იმიტომ დააყენეს, რომ სტერეოტიპი დამსხვრეულიყო, თითქოს მუსლიმი მოსახლეობა ქალს არ აირჩევს.

"შედეგებით თუ ვიმსჯელებთ, ამ სტერეოტიპის დამსხვრევა, არ მოხერხდა", - განაცხადა ზვიად კვაჭანტირაძემ ჩვენთან საუბარში.

22 მაისს 9 მაჟორიტარულ ოლქში გამართულ ადგილობრივი თვითმმართველობის არჩევნებში, ძირითადად ქართული ოცნების კანდიდატებმა გაიმარჯვეს, მათ 9-დან 7 ოლქი მოიგეს. ნაციონალური მოძრაობის კანდიდატები ოცნების კანდიდატებს მხოლოდ 4 ოლქში დაუპირისპირდნენ, საიდანაც 2 მოიგეს, მათ შორის ნასაკირალსა და კორცხელში.