აშშ-ის ელჩის საქართველოში, კელი დეგნანის განცხადებით, საელჩოს დამკვირვებლებისგან მათ აქვთ ინფორმაცია მედიაზე თავდასხმებისა და ფიზიკური დაპირისპირებების შესახებ საარჩევნო უბნებზე. ის ყველას მოუწოდებს, შეინარჩუნონ მშვიდი ატმოსფერო, რათა მოქალაქეებმა შეძლონ უბნებზე უსაფრთხოდ მისვლა და ხმის მიცემა.

"ეს არის ძალიან მნიშვნელოვანი პროცესი და დიდი დღე. მე მოხარული ვარ, რომ ამომრჩევლები მიდიან უბნებზე და აფიქსირებენ საკუთარ ხმას. ეს პროცესი ფუნდამენტურია დემოკრატიის, ჯანსაღი დემოკრატიის მშენებლობისთვის. საბედნიეროდ, ყველგან, სადაც მე ვიყავი, გარემო მშვიდი და ორგანიზებული იყო. თუმცა ჩვენ გვყავს დამკვირვებლები საქართველოს მასშტაბით და მათ დააფიქსირეს ფიზიკური თავდასხმები მედიაზე, დამკვირვებლებზე ხელის შეშლის შემთხვევები, იყო ფიზიკური დაპირისპირებებიც. მე მინდა, ყველას მოვუწოდო სიმშვიდისკენ, რათა ამომრჩევლებმა უსაფრთხოდ მისვლა და ხმის მიცემა შეძლონ", — განაცხადა მან ჟურნალისტებთან საუბრისას.

დღეს, 30 ოქტომბერს ადგილობრივი თვითმმართველობის არჩევნების მეორე ტური გაიმართება. მერი 15 თვითმმართველ თემსა და 5 თვითმმართველ ქალაქში, მათ შორის, თბილისში აირჩევა. გარდა ამისა, მეორე ტური გაიმართება 24 საარჩევნო ოლქში, რომლის შედეგად აირჩევა 42 მაჟორიტარი.