საქართველოს მე-4 პრეზიდენტმა, გიორგი მარგველაშვილმა თვითმმართველობის არჩევნების მეორე ტურზე საკუთარი არჩევანი უკვე დააფიქსირა. კენჭისყრის შენობიდან გამოსვლის შემდეგ მან განაცხადა, რომ ხმა მისცა ოპოზიციურ ცვლილებებს.

"მე მივეცი ხმა ჩემს უბნელს, მე მივეცი ხმა ოპოზიციურ ცვლილებებს, მე მივეცი ხმა იმას, რომ თბილისში, ჩემს ქალაქში დასრულდეს კორუფცია, ძარცვა და ადამიანების ქონების და ღირსების მიტაცება", — განაცხადა მარგველაშვილმა.

ფოტო: თათია შურღაია/On.ge

დღეს, 30 ოქტომბერს ადგილობრივი თვითმმართველობის არჩევნების მეორე ტური იმართება. მერი 15 თვითმმართველ თემსა და 5 თვითმმართველ ქალაქში, მათ შორის, თბილისში აირჩევა. გარდა ამისა, მეორე ტური გაიმართება 24 საარჩევნო ოლქში, რომლის შედეგად აირჩევა 42 მაჟორიტარი.