პრემიერმინისტრი ირაკლი ღარიბაშვილი ამბობს, რომ "შოუს", რასაც ყოფილი პრეზიდენტი, მიხეილ სააკაშვილი დგამს, ერთადერთი მიზანია, გადავიდეს კერძო კლინიკაში. ღარიბაშვილმა კიდევ ერთხელ აღნიშნა, რომ სააკაშვილის საქართველოში შემოსვლის ერთადერთი მიზანი რევოლუცია იყო.

"რაც შეეხება სააკაშვილის მორიგ ამ მასკარადს და თეატრს, ყველასთვის კარგად არის ცნობილი, რომ მისი ეს მცდელობა, ყველაფერი ეს შოუ, რაც მან დადგა, ემსახურება ერთადერთ მიზანს, რომ რამენაირად, ასე ვთქვათ, გადასულიყო კერძო კლინიკაში. ჩვენ, რა თქმა უნდა, ამის თაობაზე გავაკეთეთ კომენტარი და ახლაც შემიძლია გავიმეორო — ერთადერთი მიზნით ჩამოვიდა სააკაშვილი საქართველოში, მოეხდინა რევოლუცია, გადატრიალება და ის ბინძური პროვოკაცია, რაც მას ჰქონდა დაგეგმილი, მათ შორის რამდენიმე ადამიანის მკვლელობა", — თქვა ღარიბაშვილმა.

ექსპრეზიდენტი შიმშილობასთან დაკავშირებულ სამედიცინო დახმარების მიღებაზე უარს ამბობს მანამ, სანამ შეხვედრათა ოთახს პირვანდელი სახე არ დაუბრუნდება.

ადვოკატ დიმიტრი საძაგლიშვილის განცხადებით, ციხეში, შეხვედრის ოთახში სივრცე, საიდანაც წერილებს აწვდიდნენ, ბადით დაფარეს. საძაგლიშვილის თქმით, ამის მიზანი ადვოკატებსა და სააკაშვილს შორის პირდაპირი კომუნიკაციისთვის ხელის შეშლა და მათი საუბრის ხელისუფლების მხრიდან გაკონტროლებაა.

პენიტენციური სამსახურის განცხადებით კი, შეხვედრების ოთახში მინის ბარიერის აღმართვის მიზეზი ისაა, რომ ექსპრეზიდენტი, მიხეილ სააკაშვილი და მისი ადვოკატები კოვიდრეგულაციებს არღვევდნენ. კერძოდ, უწყების განმარტებით, წერილებს ისინი ერთამანეთს "მაგიდაზე ასვლის გზით" აწვდიდნენ. ამასთან, სააკაშვილი უარს ამბობდა პირბადის გამოყენებაზე.

საქართველოს ექიმთა საერთაშორისო ასოციაცია მოითხოვს, მიხეილ სააკაშვილი მრავალპროფილურ საავადმყოფოში გადაიყვანონ, სადაც საჭიროების შემთხვევაში ნებისმიერი პროფილის, დროული და კვალიფიციური სამედიცინო დახმარება, ამით კი მისი სიცოცხლის უფლება იქნება დაცული.

მიხეილ სააკაშვილი პირველ ოქტობერს, მას შემდეგ დააკავეს, რაც სოციალურ ქსელში ვიდეო გაავრცელა, სადაც ჩანდა, რომ საქართველოში იმყოფებოდა. ის 28 დღეა შიმშილობს.

ექსპრეზიდენტის ექიმი და ადვოკატები მის სათანადოდ აღჭურვილ სამოქალაქო კლინიკაში გადაყვანას ითხოვენ. მათი თქმით, პენიტენციური სამსახურის მე-18 სამედიცინო დაწესებულება არ არის აღჭურვილი იმ აპარატურით, რაც საჭიროა მიხეილ სააკაშვილის ჯანმრთელობის მონიტორინგისა და მკურნალობისთვის.

სახალხო დამცველიც მიიჩნევს, რომ ციხის საავადმყოფო სრულად არ შეესაბამება ექიმთა კონსილიუმის რეკომენდაციებს და ამასთან, არსებობს რისკები ექსპრეზიდენტის უსაფრთხოებაზეც.

ჯანდაცვის მინისტრის, ეკატერინე ტიკარაძის მტკიცებით, მიუხედავად იმისა, რომ მე-18 სამედიცინო დაწესებულებას არ აქვს გადაუდებელი მიღების შესაძლებლობა, ის სრულადაა აღჭურვილი იმისთვის, რომ საჭიროების შემთხვევაში, მიხეილ სააკაშვილი მიიღოს. იგივე პოზიცია აქვს იუსტიციის სამინისტროსაც.

პრემიერმინისტრი ირაკლი ღარიბაშვილი კი ამტკიცებს, რომ სააკაშვილს აქვს "ილუზიები", თითქოს კერძო კლინიკაში გადაყვანის შემთხვევაში, 30 ოქტომბერს მისი მხარდამჭერები მობილიზდებიან და გაათავისუფლებენ. რაც შეეხება სააკაშვილის კერძო საავადმყოფოში გადაყვანას, ღარიბაშვილი აცხადებს, რომ ციხის საავადმყოფოში ყველა პირობა არის შექმნილი და ეს გადაწყვეტილება "არ გადაიხედება".