თბილისში, 119-ე სკოლაში სასწავლო პროცესი შეჩერებულია, მასწავლებლები დირექტორის მოვალეობის შემსრულებლის თანამდებობიდან გათავისუფლებას აპროტესტებენ. თეა ბრეგვაძე ამბობს, რომ ის სამსახურიდან პოლიტიკურ ნიშნით გაუშვეს.

"მე გახლავართ ერთიანი ნაციონალური მოძრაობის მიერ გლდანის რაიონის გამგებლად წარდგენილი თენგიზ გიორგაძის დეიდა, ხოლო ის ქალბატონი არის გულმხურვალე მხარდამჭერი ოცნების და ოცნების მხარდამჭერი სურდათ შემოეყვანათ სკოლაში. სკოლა უნდათ გახადონ მართული, თავისთვის მართული", — თქვა დირექტორის მოვალეობის შემსრულებელმა, თეა ბრეგვაძემ მთავარ არხთან.

მისივე განცხადებით, დირექტორის მოვალეობას ერთი წელი ასრულებდა და სამსახურიდან წინასაარჩევნოდ გაათავისუფლეს.

სკოლის ტერიტორიაზე მისულები იყვნენ ნაციონალური მოძრაობის მიერ გლდანის გამგებლად წარდგენილი თენგიზ გიორგაძე და ავჭალის ქართული ოცნების ბიუროს წევრი ანდრია კაპანაძე. მათ შორის სიტყვიერი დაპირისპირება იყო.

როგორც თენგიზ გიორგაძე ამბობს, თეა ბრეგვაძე მმართველ გუნდს არ ემორჩილებოდა და მათ პოლიტიკურ დავალებებს არ ასრულებდა. მისი თქმით, გუშინ, 27 ოქტომბერს აქციაზე მიჰყავდათ პედაგოგები და ეს 119-ე სკოლაში ვერ შეძლეს. ხოლო როგორც დირექტორის მოვალეობის ყოფილი შემსრულებელი განმარტავს, აქციაზე წასვლის მოთხოვნა არ ყოფილა, რადგან, იცოდნენ, რომ მაინც არ მივიდოდა.

On.ge დაუკავშირდა განათლების სამინისტროს, სადაც ამბობენ, რომ თეა ბრეგაძე თანამდებობიდან პოლიტიკური ნიშნით არ გათავისუფლებულა.

"საქართველოს განათლებისა და მეცნიერების სამინისტრო ეხმიანება 119-ე სკოლის გარშემო მიმდინარე მოვლენებს და კატეგორიულად უარყოფს გავრცელებულ ინფორმაციას იმის შესახებ, რომ თითქოს 119-ე სკოლის დირექტორის მოადგილე თეა ბრეგვაძე თანამდებობიდან პოლიტიკური ნიშნით გათავისუფლდა. ეს ინფორმაცია არის ტყუილი", — წერია განათლების სამინისტროს განცხადებაში.

უწყება ხაზს უსვამს, რომ ბრეგვაძე არასდროს ყოფილა დირექტორი, იყო დირექტორის მოადგილე და დროებით ასრულებდა დირექტორის მოვალეობას.

"დირექტორს, პაატა რაზმაძეს, 2020 წლის 8 სექტემბერს ამოეწურა სამეურვეო საბჭოსთან დადებული შრომითი ხელშეკრულების 6-წლიანი ვადა, რის შემდეგ დირექტორის მოვალეობის შესრულება გააგრძელა დირექტორის მოადგილემ, თეა ბრეგვაძემ, როგორც დირექტორის არყოფნის, ან დირექტორის მიერ თავისი უფლებამოსილების განხორციელების შეუძლებლობის შემთხვევაში მართვის საინფორმაციო სისტემაში რეგისტრირებულმა პირმა", — წერია სამინისტროს განცხადებაში.

როგორც უწყებაში ამბობენ, განათლების შესახებ კანონის თანახმად, დირექტორის არჩევა ან დირექტორის/დირექტორის მოვალეობის შემსრულებლის დანიშვნა იწვევს დირექტორის მოადგილის/მოადგილეების უფლებამოსილების ვადამდე შეწყვეტას. მათი განმარტებით, თეა ბრეგვაძის მიერ "პოლიტიკური ნიშნით სპეკულაცია" მოადგილის თანამდებობიდან გათავისუფლების საკითხის შესახებ, სრულიად უსაფუძვლოა.