უკრაინის რადას დეპუტატის, ალექსანდრ კოვალჩუკის განცხადებით, უკრაინის პარლამენტი ექსპრეზიდენტ მიხეილ სააკაშვილის გათავისუფლების მოთხოვნით მიმართვას ამზადებს. მისი თქმით, უკრაინელი დეპუტატების უმრავლესობა ხელის მოწერას აპირებს წერილზე, რომელსაც საქართველოს მთავრობას გაუგზავნიან.

"გუშინ ღამე, სანამ ჩვენ გამოვემგზავრებოდით, ამ წერილის ტექსტი მივიღე. მე სიამოვნებით მოვაწერ ხელს და ჩვენი ბევრი კოლეგა და უმეტესობა უკრაინის პარლამენტის აპირებს, რომ ხელი მოაწეროს ამ მიმართვას საქართველოს ხელისუფლების [მიმართ], რომ რაც შეიძლება მალე გაათავისუფლონ პრეზიდენტი სააკაშვილი; რომ იზრუნონ მის ჯანმრთელობაზე. ეს ჩვენთვის ძალიან მნიშვნელოვანია. ჩვენ ჩვენს მოქალაქეებს არ ვტოვებთ, ასე ვთქვათ, მძიმე მდგომარეობაში. ვცდილობთ, მხარი დავუჭიროთ და მივაღწიოთ იმას, რომ რაც შეიძლება მალე გაათავისუფლონ ის", — განაცხადა დეპუტატმა მთავარ არხთან ინტერვიუში. (მთავარი არხის თარგმანი)

მისივე თქმით, სააკაშვილის ჯანმრთელობას ციხის საავადმყოფოში ადეკვატურად ვერ მიხედავენ, რადგან ამისთვის საჭირო აღჭურვილობა დაწესებულებას არ აქვს.

ექსპრეზიდენტი მიხეილ სააკაშვილი 1-ელ ოქტომბერს დააკავეს. ის დაპატიმრებიდან 27-ე დღეა შიმშილობს.

დღეს, 27 სექტემბერს უკრაინის ომბუდსმენი ლუდმილა დენისოვა მე-12 პენიტენციურ დაწესებულებაში ექსპრეზიდენტ მიხეილ სააკაშვილის მოსანახულებლად შევიდა. ვიზიტის შემდეგ მან განაცხადა, რომ მას 40 წუთის განმავლობაში ეკითხებოდნენ, რატომ ჩამოვიდა საქართველოში. მისივე თქმით, ის მხოლოდ რამდენიმე ზარისა და მუქარის შემდეგ შემოუშვეს.

დღესვე უკრაინელმა ჟურნალისტმა, დმიტრი გორდონმა სოციალურ ქსელში დაწერა, რომ საქართველოში არ შემოუშვეს. ჟურნალისტის თქმით, მისთვის ქვეყანაში არშემოშვების მიზეზი არ დაუსახლებიათ. მისივე განცხადებით, ეს საერთაშორისო სკანდალი და სირცხვილია საქართველოს ხელისუფლებისთვის.

გარდა ამისა, გუშინ, 26 ოქტომბერს სააკაშვილის ადვოკატმა, ევგენი გრუშოვეცმა განაცხადა, რომ საქართველოში არ შემოუშვეს, პასპორტი გამოართვეს და უკრაინაში აბრუნებენ.