მოქალაქის, ანა აბაშიძის თქმით, ქართული ოცნების აქციასთან დაკავშირებით თავისუფლების მოედნისკენ მიმავალი გზა უკვე გადაკეტილია, რის გამოც პოლიციამ ავტობუსიდან მგზავრები ჩამოსვა და აღნიშნულ ტერიტორიაზე ისინი არ გაატარა. ამის შესახებ მან საკუთარ Facebook-ზე დაწერა.

"ორთაჭალიდან თავისუფლების გავლით მივდიოდი სახლში, პატრულმა ავტობუსი გააჩერა, ყველა ჩამოგვსვა, თავისუფლებაზე ვერ გახვალთ — გადაკეტილიაო. ანუ, ხვალ 6 საათზე რომ შეიკრიბონ, დღეს 9 საათზე თავისუფლებაზე ტრანსპორტით ვერ უნდა გავიარო. რამეს ვზეიმობთ ხვალ? დამოუკიდებლობის დღეა? თუ რატომ ვერ გადავაადგილდები ისე, როგორც მინდა?", — წერს ის.

აღსანიშნავია, რომ გზის გადაკეტვაზე თბილისის მერიამ ინფორმაცია დღეს გაავრცელა, თუმცა მათი ცნობით, ქართული ოცნების მიერ დაგეგმილი აქციის გამო მოძრაობა 27 ოქტომბერს, 00:00 საათიდან შეიზღუდებოდა. On.ge ამ საკითხზე თბილისის მერიას დაუკავშირდა. მათ პასუხს მიღებისთანავე შემოგთავაზებთ.

ქართულმა ოცნებამ წინასაარჩევნო აქცია დააანონსა და მას "პარტიის მხარდამჭერების შემაჯამებელი საარჩევნო შეკრება" უწოდა. პარტიის თავმჯდომარის, ირაკლი კობახიძის განცხადებით, ისინი ოთხშაბათს 17:00 საათზე თავისუფლების მოედანზე შეიკრიბებიან და კიდევ აჩვენებენ, "როგორია ქართველი ხალხის ძალა, რომელიც იბრძვის ბოროტების საბოლოოდ დასამარცხებლად".