გერმანიის კანცლერის, ანგელა მერკელის პარტიამ მარტივად მოიგო ადგილობრივი არჩევნები ზაარლანდში, რომელსაც ექსპერტებისთვის სექტემბრის არჩევნების წინაპირობად მიიჩნევა.

BBC-ის ინფორმაციით, მერკელის ცენტრისტ-მემარჯვენე ქრისტიან-დემოკრატების პარტიამ ზაარლანდში 40,7% მიიღო, მისმა კონკურენტმა სოციალ-დემოკრატებმა კი - 29,6%.

ზაარლანდში კვირას ჩატარებული არჩევნების შედეგი სავარაუდოდ გავლენას მოახდენს 24 სექტემბერს დაგეგმილ მთავარ, ბუნდესტაგის არჩევნებზე, სადაც ქრისტიან-დემოკრატების კანცლერობის კანდიდატი კვლავ მერკელი იქნება.

მერკელის კანცლერის პოზიციაზე მეოთხე ვადით მოსვლას ბევრი ვარაუდობს და ზაარლანდის გამარჯვებამ მისი შანსები გაზარდა.

აღსანიშნავია, რომ მერკელის პარტიის მომხრეების რიცხვი ბოლო წლებში გაიზარდა. 2012 წელს, ქრისტიან-დემოკრატების პარტიამ 35,2% მიიღო.

ამის პარალელურად, მცირედით დაეცა სოციალ-დემოკრატების რეიტინგი. მათი რეიტინგი 2012 წელს 30,6% იყო.

ზაარლანდი კათოლიკებით დასახლებული მხარეა. ის ლუქსემბურგსა და საფრანგეთს ესაზღვრება.

რეგიონული არჩევნები სექტემბრის მთავარ არჩევნებამდე ასევე გაიმართება შლეზვიგ-ჰოლშტაინში და ჩრდილოეთ რაინ-ვესტფალიაში.