ნაციონალური მოძრაობა რუსთავში პარტიის ოფისზე მომხდარი თავდასხმის მონაწილეების დასჯას ითხოვს. პარტიის თავმჯდომარის, ნიკა მელიას საერთაშორისო საზოგადოების წარმომადგენლებს მიმართავს და ვითარების გასაცნობად ადგილზე ჩასვლას სთხოვს. გარდა ამისა, მელია საქართველოში მყოფ სხვადასხვა ქვეყნის ელჩებს მოუწოდებს, რომ მომხდარზე სწორი და დროული რეაქცია ჰქონდეთ.

"მოვითხოვთ კატეგორიულად, უახლოეს საათებში ყველა მოძალადე თავმდამსხმელი, დათო კირკიტაძის შტაბზე დაისაჯოს. დაისაჯოს კანონის სრული მოთხოვნითა და ძალით, ეს ძალიან მნიშვნელოვანია და ამავე დროს მინდა ვისარგებლო შემთხვევით და საერთაშორისო საზოგადოებას მივმართო, სადამკვირვებლო მისიებს, ჩვენ მათთან გვექნება ახლა საუბარი სატელეფონო, რომ ადგილზე თუ არის შესაძლებელი, გამოცხადნენ რუსთავში და მთელმა მსოფლიომ გაიგოს, თუ რა არის ბიძინა ივანიშვილის რეჟიმი, რომელიც 30 ოქტომბერს უნდა დავამარცხოთ, მაგრამ ჩვენი სურვილია, მშვიდობიანად დავამარცხოთ და არა, ცემა-ტყეპით. ამიტომ, ვთხოვ, ყველა აკრედიტირებულ ელჩს საქართველოში ჰქონდეს სწორი და დროული რეაქცია", — ამბობს ის.

ამასთან, მელია ოპოზიციის ამომრჩევლებს სიმშვიდისკენ მოუწოდებს და აღნიშნავს, რომ ქართულმა ოცნებამ არჩევნების მეორე ტურის წინ "სახე დაკარგა", რადგან იციან, რომ მარცხდებიან.

"სწორედ ის ხალხია, ვინც იძალადა ერთი კვირის წინ რუსთავში, მშვიდობიანი აქციის მონაწილეებზე, რომლებიც თავისუფლების მოედნისკენ მოემართებოდნენ რუსთავიდან და არანაირი რეაგირება არ მოხდა მაშინ და შედეგად, ეს გაკადნიერებული ხალხი ბედავს იმას, რომ უკვე ოფისზე ახორციელებენ თავდასხმას", — დასძენს მელია.

ენმ-ის რუსთავის მერობის კანდიდატის, დავით კირკიტაძის ინფორმაციით, პარტიის ოფისის თანამშრომლებს ქართული ოცნების 20-მდე აქტივისტი თავს დაესხა. მისი თქმით, მძიმედ ორი, ხოლო, ნაკლებად მძიმედ ერთი ადამიანია დაშავებული.