სამეგრელოში პატრულ-ინპექტორმა, ომარ არქანიამ პროტესტის ნიშნად სამსახური დატოვა. როგორც ის ამბობს, რამდენიმე დღის წინ დაკავებული ლექსო რაფავა მისი მეგობარია.

"წამოვედი ჩემი პირადი პატაკის საფუძველზე, არანაირ ზეწოლას ადგილი არ ჰქონია. პირიქით, მადლობა ხელმძღვანელობას. რაც შეეხება ლექსო რაფავას, არის ჩემი ძმა და უფროსი მეგობარი. თითქოს მე ავიყვანე ადვოკატი, სიმართლეს არ შეესაბამება. წარმატებები მინდა ვუსურვო ჩემს კოლეგებს და მეგობრებს", — წერს არქანია.

ენმ-ის წევრი, თენგიზ გუნავა ამბობს, რომ რაფავას დაკავების შემდეგ პოლიციის რამდენიმე თანამშრომელს სურდა სამსახურის დატოვება.

"ლექსოს ასეთი უმსგავსო დაჭერისა და რუსლანისთან შევარდნის შემდეგ, ბევრმა გამოხატა პროტესტი და მე მქონდა ინფორმაციები, რომ პოლიციის რამდენიმე მუშაკს სურდა დაეტოვებინა სამსახური ამის გამო. დღეს უკვე დადასტურდა, რომ ერთ-ერთმა, ომარ არქანიამ, პატრულ-ისპექტორია ეს ახალგაზრდა კაცი, თქვა და გადადგა კიდევაც. ამისთანა უმსგავსობას არავინ შეეგუება", — აცხადებს გუნავა.

On.ge დაუკავშირდა შინაგან საქმეთა სამინისტროს. უწყების პასუხს მიღებისთანავე შემოგთავაზებთ.

20 ოქტომბერს, ღამით ხობში ორი ყოფილი ძალოვანის, ლექსო რაფავასა და რუსლან შომახიას საცხოვრებელი სახლები გაჩხრიკეს. რაფავა დააკავეს, შამახიას თქმით კი, წაიღეს მის სახელზე გაფორმებული იარაღი. ენმ აცხადებს, რომ ლექსო რაფავას იარაღი და ხელყუმბარა ჩაუდეს. შსს-ს ცენტრალური კრიმინალური პოლიციის დეპარტამენტის დირექტორმა, მამუკა ჭელიძემ ჟურნალისტების კითხვას მომხდართან დაკავშირებით უპასუხა, რომ სტანდარტული საპოლიციო ღონისძიებები განხორციელდა. სხვა კომენტარს შსს ამ ეტაპზე არ აკეთებს

21 ოქტომბერს სამეგრელო-ზემო სვანეთის სასაზღვრო პოლიციის თანამშრომელმა, რევაზ ლაზიშვილმა პროსტესტის ნიშნად თანამდებობა დატოვა. მისი თქმით, არ შეეძლო კაბინეტიდან ეყურებინა გმირი პოლიციელების მიმართ ჩატარებული ქმედებებისთვის და ეს გადაწყვეტილებაც ამიტომ მიიღო. 22 ოქტომბერს კი სამსახურიდან წავიდა შსს-ს გენერალური ინსპექციის დეპარტამენტის ოპერატიული უზრუნველყოფის მეორე სამმართველოს უფროსის მოადგილე, ჭაბუკა რაფავაც.