თბილისის მერისა და მერობის კანდიდატი კახა კალაძე ამბობს, რომ ნაციონალური მოძრობის თავმჯდომარის, ნიკა მელიას შეთავაზებას დებატებზე არ დათანხმდება, რადგან მელია პირველი დებატების დროს სტუდიიდან გაიქცა. მისივე თქმით, მან დებატების გამართვის გადაწყვეტილება მერობის კანდიდატების პატივსაცემად მიიღო.

"როგორ წარმოგიდგენიათ დებატებში დავჯდე ადამიანთან, რომელიც პირველი დებატების დროს გაიქცა უბრალოდ, შეურაცხყოფა მიაყენა სტუდიაში მყოფ ყველა კანდიდატს. მე ეს გადაწყვეტილება კანდიდატების პატივსაცემად მივიღე და ჩემი მოვალეობაც არის. კანდიდატი ვარ საზოგადოების წინაშე წარვდგე ჩემი საარჩევნო და გავმართო ჯანსაღი პოლემიკა და დებატები იმ კანდიდატებთან, რომლებსაც თავი ჰქონდათ დაყენებული მერობის არჩევნებზე. მიშა სააკაშვილზე უნდა ისაუბროს და მე უნდა ვისაუბრო ქალაქზე? ეს არის ნორმალური?", — განაცხადა კალაძემ რუსთავი 2-თან.

19 ოქტომბერს მელიამ კალაძეს ღია დებატები შესთავაზა. მისი თქმით, ნაცვლად იმისა, რომ თბილისის პრობლემებზე ისაუბროს, კალაძე "ზიზღის კამპანიაში გადაეშვა".

აღსანიშნია, რომ პირველი ტურის წინ საზოგადოებრივი მაუწყებლის ეთერში გამართული დებატები თბილისის მერობის კანდიდატებს შორის ნიკა მელიამ დატოვა. მან განაცხადა, რომ არ აპირებს ერთ სივრცეში ყოფნას ადამიანთან, რომელიც მართავს კრიმინალებს.