იუსტიციის სამინისტროს ინფორმაციით, გენერალურმა ინსპექციამ რუსთავის მე-12 პენიტენციურ დაწესებულებაში ფანჯრის ჩამომტვრევის ფაქტზე წინასაგამოძიებო მოქმედებები დაიწყო. საქმე ეხება იმ ფანჯარას, საიდანაც გუშინ, 21 ოქტომბერს, მიხეილ სააკაშვილი მხარდამჭერებს მიესალმა.

სამინისტროში On.ge-ს განუცხადეს, რომ გამოძიების დაწყების მიზეზი გახდა შეტყობინება, რომლის თანახმადაც, სააკაშვილის საშხაპე ოთახში ყოფნისას ფანჯრის მინა ჩამოიმტვრა.

"იუსტიციის სამინისტროს გენერალურმა ინსპექციამ მე-12 პენიტენციურ დაწესებულებაში ფანჯრის ჩამომტვრევის ფაქტზე წინასაგამოძიებო მოქმედებები დაიწყო. მოქმედებების დაწყების საფუძველი გახდა 2021 წლის 21 ოქტომბრის შეტყობინება, რომლის თანახმადაც მსჯავრდებულ/ბრალდებულ მიხეილ სააკაშვილის საშხაპე ოთახში ყოფნისას ფანჯრის მინა ჩამოიმტვრა. აღნიშნული წარმოების ფარგლებში გამომძიებელი დაუკავშირდა მსჯავრდებულ/ბრალდებულ მიხეილ სააკაშვილის ინტერესების დამცველ ადვოკატს, დიმიტრი საძაგლიშვილს, რომელთან შეთანხმებით 2021 წლის 22 ოქტომბერს დაიგეგმა მსჯავრდებულ მიხეილ სააკაშვილთან გასაუბრება", — აცხადებენ უწყებაში.

21 ოქტომბერს, რუსთავის ციხესთან მესამე პრეზიდენტის მხარდამჭერები იყვნენ შეკრებილნი, როცა ერთ-ერთი ფანჯრიდან მიხეილ სააკაშვილმა გადმოიხედა. გავრცელებულ კადრებში ჩანს, რომ ის ფანჯრის გახსნას ცდილობდა, რის შემდეგაც გამოიხედა, შეკრებილებს გადმოსძახა და ხელით გული უჩვენა. მხარდამჭერები მის სახელს სკანდირებდნენ და "მიშა მაგარიას" მღეროდნენ.

პენიტენციურმა სამსახურმა განაცხადა, რომ ექსპრეზიდენტმა შინაგანაწესი დაარღვია, როცა მხარდამჭერებს ფანჯრიდან მიმართა. უწყების განმარტებით, სააკაშვილს საკანი არ შეუცვლია და საშხაპის ფანჯრიდან იყურებოდა, სადაც დაცვას შესვლის უფლება არ აქვს. მათივე თქმით, სააკაშვილმა ამ გარემოებით ისარგებლა, თუმცა დაწესებულების თანამშრომლებმა "უკანონო ქმედება მყისიერად აღკვეთეს". უწყებაში განაცხადეს, რომ ხმაური ან სხვაგვარი ქმედება, რომელიც არღვევს წესრიგს და "ხელს უშლის დაწესებულების ნორმალურ ფუნქციონირებას", მიიჩნევა დისციპლინურ დარღვევად, ამიტომ სააკაშვილის გადაძახილზე "კანონმდებლობით განსაზღვრული შესაბამისი რეაგირება მოახდინეს".