პრემიერმინისტრი, ირაკლი ღარიბაშვილი აცხადებს, რომ იმ შემთხვევაში, თუ ენმ-ის სენაკის მერობის კანდიდატი, კობა ნაყოფია გაიმარჯვებს, ის ხელისუფლების გარეშე "ნაბიჯს ვერ გადადგამს", რადგან ცენტრალური ხელისუფლება მათ ხელშია, ნაყოფიას კი "არანაირი პერსპექტივა არ აქვს".

"რა პერსპექტივა აქვს კობა ნაყოფიას, რა უნდა გააკეთოს კობა ნაყოფიამ, მით უმეტეს, ხელისუფლება ჩვენია, ცენტრალური მთავრობა ჩვენია, ჩვენს გარეშე ნაბიჯს ვერ გადადგამს, თეორიულადაც ვიძახი, რომც არჩეულიყო... ჰიპოთეტურად ვამბობ, რომ ნებისმიერ მუნიციპალიტეტში სხვა კანდიდატი, რომ გავიდეს ცენტრალური მთავრობის გარეშე პერსპექტივა არ აქვს უბრალოდ, ეს არის თავის მოტყუება, თავის დაჩაგვრა არის და თავის დასჯა გამოდის", — ამბობს ღარიბაშვილი.

ის ხაზს უსვამს, რომ ნაყოფიას სენაკის მერობა სურს, როცა იქ სახლიც კი არ აქვს. გარდა ამისა, ღარიბაშვილის მტკიცებით, ფლობს ინფორმაციას, რომ ნაყოფია უკრაინაში, კერძო კომპანიაში იწყებს მუშაობას და არჩევნების დასრულების შემდეგ ქვეყნის დატოვებას გეგმავს.

"მეორე მხარეს არის კაცი, რომელსაც არაფერი არ გაუკეთებია სენაკისთვის და ვერც გააკეთებს, ეს არის ტყუილი, დადის და ატყუებს მოსახლეობას. თუ რამის გაკეთება მას უნდოდა პირადად, მას ჰქონდა ამის შესაძლებლობაც და თუ სურვილი ექნებოდა რეალურად, მას შეეძლო რამე გაეკეთებინა, სახლიც კი არ აქვს სენაკში და სენაკის მერობაზე აცხადებს პრეტენზიას. ამ დროს, მე გეტყვით სრული პასუხისმგებლობით, რომ მას აქვს გადაწყვეტილი ქვეყნის დატოვება და უკრაინაში გადასვლა არჩევნების დამთავრების შემდეგ, ვინაიდან იქ იწყებს მუშაობას კერძო კომპანიაში, თვითონ სააკაშვილის გუნდის წევრებიც გარბიან", — აცხადებს ღარიბაშვილი.

სენაკში თვითმმართველობის არჩევნების მეორე ტურში კობა ნაყოფია ქართული ოცნების კანდიდატს, ვახტანგ გადელიას უპირისპირდება. ცესკოს მონაცემებით, ხმები ასე გადანაწილდა:

  • კობა ნაყოფია — 42.35%;
  • ვახტანგ გადელია — 40,251%.

თვითმმართველობის არჩევნების მეორე ტური 30 ოქტომბერს ჩატარდება.