მსოფლიო ბანკის რეგიონული დირექტორი სამხრეთ კავკასიაში სებასტიან მოლინეუსი აცხადებს, რომ საქართველოს მთავრობის მიმდინარე პოლიტიკური რიტორიკა ქვეყანაში ინვესტიციების მოზიდვისთვის ხელისშემწყობი არ არის. ამის შესახებ მოლინეუსმა შავი ზღვა — საუბრები კავშირების განმტკიცებაზე პანელურ დისკუსიაზე დასმული კითხვის პასუხად განაცხადა.

"საქართველომ უნდა გააგრძელოს თავისი ეკონომიკური რეფორმების გზა და უზრუნველყო პოზიტიური ხელსაყრელი გარემო ინვესტიციებისთვის. წინა კვლევებს თუ გადავხედავთ, საქართველოს უცხოური ინვესტიციების მოზიდვის უნარი აქვს. ჩვენ ვხედავთ უამრავ დადებითს, მაგრამ მაინც ვამჩნევთ ინფრასტრუქტურის, ადამიანური კაპიტალის გაუმჯობესების აუცილებლობას და განსაკუთრებით, როდესაც საქმე ეხება უნარებს, არის გარკვეული გეოპოლიტიკური შეშფოთებაც და რა თქმა უნდა, მიმდინარე პოლიტიკური რიტორიკა, რომელიც [ინვესტიციების მოზიდვას] ხელს არ უწყობს", — განაცხადა მოლენიუსმა.

მან, ასევე, დასძინა, რომ საქართველო ყოველთვის ჰყავდა რეფორმების გამტარებელი მთავრობა და დარწმუნებულია, რომ ქვეყანა ამ გზას გააგრძელებს ევროკავშირთან, მსოფლიო ბანკთან და სხვა საერთაშორისო დამფინანსებლებთან ერთად.

ბათუმში პანელური დისკუსია შავი ზღვა — საუბრები კავშირების განმტკიცებაზე ევროკავშირის, ევროპის საინვესტიციო ბანკის (EIB), ევროპის რეკონსტრუქციისა და განვითარების ბანკის (EBRD) და მსოფლიო ბანკის (WB), ასევე ადგილობრივი ახალგაზრდებისა და ახალგაზრდა მეწარმეების მონაწილეობით მიმდინარეობს.

დისკუსია დაეფუძნა ევროკავშირის ეკონომიკურ და საინვესტიციო გეგმას საქართველოსთვის და შეეხება ტრანსპორტთან, ციფრულ კომუნიკაციებთან და გარემოსთან დაკავშირებულ საკითხებს.