დღეს, 20 ოქტომბერს საქართველოს პრემიერმინისტრი ირაკლი ღარიბაშვილი კავკასიასა და ცენტრალურ აზიაში NATO-ს გენერალური მდივნის სპეციალურ წარმომადგენელს, ხავიერ კოლომინას შეხვდა. მთავრობის ადმინისტრაციის ინფორმაციით, დახურულ შეხვედრაზე განიხილეს NATO-ს ღია კარის პოლიტიკა და ჩრდილოატლანტიკურ ალიანსში საქართველოს ინტეგრაციის პროცესი.

"აღინიშნა, რომ საქართველომ მნიშვნელოვან პროგრესს მიაღწია ევროპული და ევროატლანტიკური ინტეგრაციის გზაზე, ასევე დემოკრატიული ინსტიტუტების გაძლიერებისა და თავდაცვის რეფორმების განხორციელების მიმართულებით.

საუბრისას, ყურადღება დაეთმო ნატოს 2022 წლის სამიტს. აღინიშნა, რომ სამიტი იქნება კარგი შესაძლებლობა, სათანადოდ შეფასდეს საქართველოს პროგრესი, რაც თავის მხრივ, კიდევ უფრო გააძლიერებს ქვეყნის წინსვლას ევროატლანტიკური ინტეგრაციის გზაზე", — ნათქვამია განცხადებაში.

განცხადებაში ნათქვამია, რომ შეხვედრისას ყურადღება გამახვილდა საქართველოს როლზე საერთაშორისო სამშვიდობო მისიებში, კერძოდ, ავღანეთში, ISAF-ის ოპერაციაში და მტკიცე მხარდაჭერის მისიის დასრულების შემდგომ ავღანეთიდან განხორციელებული ევაკუაციის პროცესში.

მათვე ინფორმაციით, ყურადღება გამახვილდა ნატო-საქართველოს არსებითი პაკეტის (SNGP) განხორციელების შესახებ, რაც ნატოს მთავარ პრაქტიკული მხარდაჭერის მთავარი მექანიზმია.

"შეხვედრაზე საუბარი ასევე შეეხო ნატო-საქართველოს ერთობლივი წვრთნების მნიშვნელობას და აღინიშნა, რომ ერთობლივი ძალისხმევით შესაძლებელი გახდა ნატოს სტანდარტების შესაბამისი სასწავლო ინფრასტრუქტურის მოდერნიზება და განვითარება, შესაბამისად, საქართველო მზადაა, მოკავშირეებს ფართომასშტაბიანი წვრთნებისთვის მაღალი სტანდარტების გარემო შესთავაზო", — ვკითხულობთ განცხადებაში.

გუშინ, 19 ოქტომბერს კოლომინა პრეზიდენტ სალომე ზურაბიშვილს შეხვდა. პრეზიდენტის ადმინისტრაციის ინფორმაციით, ზურაბიშვილი კოლომინას ოკუპირებულ ტერიტორიებზე შექმნილ მძიმე ჰუმანიტარულ მდგომარეობაზე ესაუბრა.

ხავიერ კოლომინა ვიზიტის ფარგლებში ასევე შეხვდა პარლამენტის თავმჯდომარეს, კახა კუჭავას და საგარეო საქმეთა მინისტრ დავით ზალკალიანს. კოლომინამ განაცხადა, რომ რუსეთი საფრთხეს უქმნის რეგიონის სტაბილურობას.

ხავიერ კოლომინა საქართველოს რეგიონული ტურნეს ფარგლებში ეწვია. იგი უკვე იმყოფებოდა აზერბაიჯანში, ხვალ კი სომხეთში გაემგზავრება.