ლელოს ლიდერმა, მამუკა ხაზარაძემ პარლამენტის თავმჯდომარეს, კახა კუჭავას ჰკითხა, რატომ არ მიიწვია პარლამენტში მოსმენებზე პასუხისმგებელი უწყებების წარმომადგენლები, როცა მან და ბადრი ჯაფარიძემ ჩანაწერების ნაწილის ავთენტურობა დაადასტურეს.

"მე მინდა მივმართო ბატონ კახა კუჭავას. მე გახლავართ თქვენი კოლეგა ბატონო კახა, რომელმაც ხმამაღლა დააფიქსირა 19 შემთხვევა ჩემი ჩანაწერების, მერე მივიდა პროკურატურაში და იქ 40 ჩანაწერი დავადასტურე, რომ ეს არის ავთენტური დეა მე მქონდა 40-ვე საუბრის შემთხვევა. ახლა არ მითხრათ, რომ მიმდინარეობს გამოძიება. მე გეკითხებით თქვენ, როგორც პარლამენტის თავმჯდომარემ, რა მოიმოქმედეთ იმისათვის, რომ თქვენი კოლეგა, რომელსაც უსმენენ უკანონოდ, ამ შემთხვევაში, მამუკა ხაზარაძე, ბადრი ჯაფარიძე, რაც დადასტურებულია, რატომ არ გამოიძახეთ აქ ის პასუხისმგებელი პირები, რომ პოლიტიკურად გაგერკვიათ და კითხვები დაგვესვა ყველას, რომ ესენი გვისმენენ, თუ უკანონოდ გვისმენს რომელიმე სხვა სახელმწიფოს სამსახური", — განაცხადა მან პარლამენტში.

ხაზარაძემ თქვა, რომ პარლამენტი ფიქციაა, რადგან აზრის გამოთქმას აზრი არ აქვს, როდესაც ოპოზიციაში ხარ, რადგან უმრავლესობა უყურებთ მას, როგორც მტერს.

"მეორე ტური დაიწყო და მე მინდა გითხრათ, რატომ გაბოროტდით ასე, რა არის ეს ზიზღის ენა, ეს ძალადობა? ვის ასმენინებთ ამას, თქვენი ოჯახის წევრებს, მთელს საქართველოს, ნახევარ ამომრჩეველს, რომელსაც არ მოსწონს თქვენი პოლიტიკა? რას ემსახურება, ეს ხომ სახელმწიფოებრივი არ არის?! ეს ხომ არ არის ჩვენს ხვალინდელ დღეზე ორიენტირებული? როდემდე უნდა ვიძახოთ 9-წლიანი ამბავი, როდესაც დაჭერილი გყავთ ეს პრეზიდენტი და ერთადერთი რაც არის საჭირო ამ ქვეყანაში, სამართლიანი სასამართlოა, არამარტო ამ კაცისთვის, არამედ თითოეული თქვენგანისთვის", — განაცხადა მან.

ხაზარაძის კითხვას უპასუხა პარლამენტის თავმჯდომარემ და განაცხადა, რომ მოსმენების გამოძიება ჯერ გამოძიება ადრეულ ეტაპზე და საჭირო დროს ყველას ექნება საშუალება, პასუხისმგებელ პირებს პარლამენტში კითხვები დაუსვას.

"საუბარი არის კრებსებზე, თხრობითი ფორმით არის გარკვეული ტექსტი წარმოგენილი. თქვენ თვითონ ახსენეთ ხომ, სხვა სახელმწიფო შეიძლება გვისმენდეს, თუ ვინ შეიძლება გვისმენდეს, კანონიერად თუ უკანონოდ გვისმენდეს. ჩვენ აქ ვერ დავადგენთ ამას. მინიმუმ თუ რაღაც ეტაპზე მაინც არ მივიდა გამოძიება, რომლის საფუძველზე, რაც გვექნება კითხვები გაეცემა პასუხი აქ. ამის გარანტიას გაძლევთ, რომ ამის საშუალება გვექნება და გვექნება მალე, რომ ყველა კითხვა რაც გაგვაჩნია დაისვას და შესაბამისმა უწყებებმა გაგვცეს პასუხი", — განაცხადა მან.