თბილისის მერიის განცხადებით, გარემოვაჭრეებს მუნიციპალიტეტის ტერიტორიაზე უკანონო საქმიანობის განხორციელების უფლება აღარ მიეცემათ.

მერია განმარტავს, რომ ბაზრობების ასოციაციასთან გამართული მოლაპარაკებების შედეგად, გარემოვაჭრეებს შეეძლებათ შეღავათიანი პირობებით ექვსი თვით ისარგებლონ შემდეგი სავაჭრო ტერიტორიებით:

  • რკინიგზის სადგური და მისი მიმდებარე ტერიტორია,
  • დინამოს მიმდებარე ტერიტორია,
  • მეტრო დიდუბის მიმდებარე ტერიტორია,
  • ძველი დეზერტირების ბაზრის ადგილას აშენებული ახალი ბაზრის ტერიტორია,
  • ისნისა და სამგორის ბაზრობების ტერიტორიები.

მერია აცხადებს, რომ უნებართვო გარევაჭრობა უკანონო საქმიანობაა და დაკავშირებულია ისეთ პრობლემეთან როგორიცაა, შეფერხება გადაადგილებისას, უსაფრთხოების ნორმების დაცვის ხელშეშლა, ანტისანიტარია, მალფუჭებადი პროდუქტის შენახვის პირობების დაუცველობა, გაურკვეველი წარმოების პროდუქციის გაყიდვა, ქალაქში არსებული ტურისტული ზონებისა და თბილისის იერსახის დამახინჯება.

თბილისის მერიამ 19 მარტის დილიდან მეტრო მარჯანიშვილის მიმდებარე ტერიტორიაზე გარემოვაჭრეებს მუშაობის უფლება არ მისცა.