ქართული ოცნების აღმასრულებელი მდივანი, მამუკა მდინარაძე ღია წერილთან დაკავშირებით ამბობს, რომ მიხეილ სააკაშვილი სამართლიანი სასამართლოს წინაშე უკვე წარსდგა.

"სამართლიანი სასამართლოს წინაშე უკვე წარსდგა ეს ადამიანი დაუსწრებლად, მაგრამ მაინც, და მის მიმართ კონკრეტული განაჩენებია, ასევე, არ უნდა დაგვავიწყდეს სტრასბურგის სასამართლოს გადაწყვეტილება, სადაც ისიც არ უნდა დაგვავიწყდეს, რომ წერია იმ საქმესთან დაკავშირებით, რომელზეც უკვე მსჯავრდებულია მიხეილ სააკაშვილი, რომ გაოგნდა სტრასბურგის სასამართლო იმ სისტემური დანაშაულით, რომლის სათავეშიც მიხეილ სააკაშვილი იყო და ამისთვის იხდის ის სასჯელს.

აგრეთვე არის მიმდინარე საქმეები, რა თქმა უნდა, როგორც საქართველოში, ასევე მის ფარგლებს გარეთაც, შემდეგ აუცილებლად გაასაჩივრებენ, რაღაც პერიოდის შემდეგ, შეიძლება წლების შემდეგ, მაგრამ მაინც და სტრასბურგის სასამართლო, ზუსტად ვიცი და დარწმუნებული ვარ, რომ იტყვის იგივეს, არ შეიძლება იმ სისტემის ხელმძღვანელის მიმართ სხვანაირი განაჩენი გამოვიდეს, რომელმაც ბოროტებაზე დააფუძნა სახელმწიფო მმართველობა თავის დროზე", — აცხადებს მდინარაძე.

მდინარაძე ამბობს, რომ პარტიის ყველა წევრი მზადაა მათ უცხოეულ კოლეგებს აუხსნან, თუ რა "ბოროტებასთან" აქვთ საქმე.

"ნებისმიერ მათგანს, ვინც ხელს აწერს, ერთი ადამიანი რომ იყოს ჩვენი კოლეგა, ჩვენი ევროპელი კოლეგა, ნებისმიერ მათგანს პირადად მეც და ჩვენი გუნდის ნებისმიერი წევრი, მზად ვართ, დავუჯდეთ, მოვუყვეთ, ავუხსნათ, ოღონდ დოკუმენტებით, ისე კი არა, მეორე მხრიდან ფეიკები რომ მოგვდის ხოლმე, დოკუმენტებით დავუჯდეთ და ავუხსნათ, რა ბოროტებასთან გვაქვს საქმე. ვიღაც შეიძლება სუბიექტური იყო, ვიღაც შეიძლება ლობისტის შემოქმედების შედეგად აწერდეს ხელს და ა.შ ასეთი ხდება, სამწუხაროდ, 25 არის თუ 30 მიხეილ სააკაშვილსაც გამოუჩნდა მხარდამჭერი, რომელიც მიუხედავად მისი სასტიკი და ბოროტი დანაშაულებისა, მის გათავისუფლებას ითხოვს", — დასძენს ის.

ღია წერილში, რომელიც დღეს, 18 ოქტომბერს გამოქვეყნდა, აღნიშნულია, რომ მიხეილ სააკაშვილი პატიმრობიდან უნდა გათავისუფლდეს, სანამ მისთვის წაყენებული ბრალდებებისთვის სამართლიან სასამართლო პროცესზე წარსდგება.

ამავე თემაზე: